У гарадзенскай турме, дзе трымаюць вядомых палітыкаў, апынуўся фігурант справы Аўтуховіча Павал Разановіч, якога ў 2022 годзе асудзілі за «падрыхтоўку да тэрарызму».
Палітвязня Паўла Разановіча перавялі з калоніі № 17 у Шклове ў гарадзенскую турму № 1 у снежні мінулага года. Дасведчаная крыніца таксама паведаміла Свабодзе, што ўмовы ўтрымання Разановіча сталі больш жорсткімі, але скаргаў ад яго не атрымлівалі.
«Перавялі на турэмны рэжым. Але стаўленне ў новай вязніцы нармальнае, даходзяць лісты, ёсць спатканні. Ён не скардзіцца, настрою не траціць», — паведаміў суразмоўца.
Павал Разановіч мае юрыдычную адукацыю, да арышту ўвосень 2020 году ён працаваў у раённым аддзеле прымусовага выканання пакаранняў у Брэсце. Разановіча асудзілі на 19 гадоў зняволення. Яго прызналі вінаватым паводле чатырох артыкулаў Крымінальнага кодэкса, у тым ліку ў падрыхтоўцы да акта тэрарызму.
На судзе абвінавачаны віны не прызнаваў і паведаміў, што супраць яго падчас следства ўжывалі фізічныя і псіхалагічныя катаванні. З папраўчай калоніі ў крытую турму Разановіча перавялі па пастанове суду як злоснага парушальніка рэжыму ўтрымання.
У справе Мікалая Аўтуховіча аб тэрарызме ўсяго фігуравала 12 чалавек, сярод іх пенсіянерка Ірына Мельхер з Брэста. Ірына адбывае пакаранне ў гомельскай жаночай калоніі № 4. Пра сітуацыю ў Ірыны Мельхер расказала асуджаная, якая нядаўна вызвалілася з калоніі.
«Ёй 68 гадоў, таму на працу яе не водзяць. Сядзіць у корпусе; максімум, чым яе займаюць, — дзяжурствам па атрадзе. У яе праблемы з хрыбетнікам, увогуле са здароўем не ўсё добра, таму гэтым займаецца, неяк лечыцца. Настрой у яе нармальны, яна маладых падтрымлівае і пераконвае, калі што, дык не сварыцца. Кажа, што мы ўсе тут у палоне, таму трэба адпаведна сябе паводзіць», — расказала суразмоўца.
Вядома, што Ірына Мельхер з чатырох выстаўленых ёй абвінавачанняў прызнала віну толькі ў адным — ва ўдзеле ў карагодзе, які 13 верасня 2020 году правялі ў Брэсце дэманстранты на знак пратэсту супраць фальшавання прэзідэнцкіх выбараў. Суд пакараў жанчыну 17 гадамі зняволення.
Праваабаронцы прызналі Ірыну Мельхер, як і іншых фігурантаў справы Аўтуховіча, палітвязнямі.
-
26‑гадовы Андрэй паехаў у Расію ў марскі флот. Але трапіў на вайну і загінуў — маці кажа, спакусіўся вялікімі грашыма
-
Украінскі палітолаг: Дроны могуць нечакана прыляцець і ў мінскі аэрапорт, і на нафтаперапрацоўчыя заводы
-
Ціханоўская пра Бабарыку і Калеснікаву: Не бачу праблемы, калі яны будуць развіваць сваю партыю
Цяпер чытаюць
26‑гадовы Андрэй паехаў у Расію ў марскі флот. Але трапіў на вайну і загінуў — маці кажа, спакусіўся вялікімі грашыма4
26‑гадовы Андрэй паехаў у Расію ў марскі флот. Але трапіў на вайну і загінуў — маці кажа, спакусіўся вялікімі грашыма
«Па-беларуску «Слана» Філіпенкі набывалі больш ахвотна, чым па-руску». Якія кнігі сёння ў топе? Інтэрв'ю з кіраўніцай выдавецтва Gutenberg Publisher55
Каментары