Напярэдадні традыцыйнай Ночы музеяў — з 18 на 19 мая — расказваем, куды варта завітаць у сталіцы і за яе межамі. Квіткі на праграмы ў гэтым годзе — ад 2 да 30 рублёў.
Назіраць за Месяцам і больш даведацца пра Сонечную сістэму
Праграма Нацыянальнага мастацкага музея ў гэтым годзе прысвечаная тэме святла. Расказваць пра яго будуць мовай мастацтва і лекцый, шоу і інсталяцый.
Рэкамендуем завітаць на сустрэчу з вядомым фатографам і астраномам Віктарам Малышчыцам — ён запрашае ўсіх ахвотных разам з ім паназіраць за Месяцам з 21:00 да двух ночы — Віктару дакладна ёсць што пра яго распавесці.
З цікавых майстар-класаў у гэтым годзе — роспіс шопераў, выцінанка і малюнкі кавай.
«Вярнуць свой двухтысячны»
Досыць шырокую літаратурна-музычную праграму ў гэтым годзе прапануе Музей гісторыі беларускай літаратуры. Будзе і экспромт-тэатр ад народнага літаратурнага тэатра «Жывое слова», і майстар-клас па традыцыйных беларускіх ляльках ад Ганны Сілівончык, і выступ фолк-дуэта «RALLA» — выглядае, што сумаваць не прыйдзецца.
Тых жа, хто хоча «вярнуць свой двухтысячны год», чакае літаратурны музей Петруся Броўкі. Чаго толькі варты майстар-клас па гульні ў гумачку і магчымасць запоўніць сяброўскую анкету (памятаеце, такія раней падсоўвалі сябры і аднакласнікі, дзе пыталіся, кім ты хочаш стаць і якім гуртам рэспектуеш?).
Дадатковым пагружэннем у мінулае стане калектыўны прагляд рэкламы з 90-х і нулявых, крэатыўнасць і разняволенасць якой у тыя часы зашкальвала.
Экскурсія па мемах
Мінская галерэя «Фарба» прапануе завітаць да іх на экскурсію па мемах — абяцаюць больш за 100 шэдэўраў у іх галерэі на плошчы Свабоды, 8. Так што калі вы аматар даслаць сябрам ці калегам у рабочым чаце жменьку мемаў і хацелі б разбірацца ў гэтым пласце культуры яшчэ лепш, то самы час.
Мем-экскурсія на беларускай мове стартуе 18 мая ў 19.30.
Роспіс кубкаў беларускім арнаментам
У сталічнай галерэі «Арт-фабрыка» мерапрыемствы стартуюць з 16.00 і працягнуцца да гадзіны ночы. Праграма досыць аб’ёмная. Раім абавязкова завітаць на майстар-клас Паўліны Чарапок па распісванні кубкаў вітражнымі фарбамі ў стылі беларускага арнаменту — пачатак а 20-й.
Фолк-дыскатэка
Дзяржаўны літаратурны музей Янкі Купалы ў гэтым годзе святкуе 80-годдзе і да гэтае даты падрыхтаваў тэматычную выставу. Але пры гэтым імяніннік плануе сам арганізаваць розыгрыш падарунка ў гонар свайго дня народзінаў.
Дэсертам вечарыны стане выступ гурта «Арацэя» — этнічныя мелодыі ў сучаснай апрацоўцы для вашых сольных ці кампанейскіх танцаў.
Пачуць песні папулярнага тыктокера
Калі вы засядаеце ў тыктоку, то маглі бачыць відэа пра беларускую мову ад Іллі Шынкарэнкі — яны набіраюць дзясяткі тысяч праглядаў. 18 мая хлопец выступіць у музеі Багдановіча: выканае як песні на вершы беларускіх класікаў так і свае ўласныя.
Па-за межамі сталіцы
Па сапраўдную аўтэнтычнасць раім адпраўляцца за межы Мінска, сеўшы на машыну ці грамадскі транспарт. Вялікі выбар крутых інтэрактываў прапаноўвае, напрыклад, Веткаўскі музей стараверства і беларускіх традыцый. Вас чакае і вядомы абрад «Пахаванне стралы», і песні ў выкананні фолк-калектываў, і прагляд фільма пра абрадавы цыкл Палесся, а яшчэ — атрыманне карысных ведаў па стварэнні вясельных вяночкаў.
Што нечакана, усе актыўнасці ў гэтым музеі — бясплатныя, але каманда будзе радая любым данатам.
Полацкі гісторыка-культурны музей-запаведнік у сваю чаргу падрыхтаваў шырокую дзіцячую праграму, у якой — спецыяльная тэатралізаваная дзея «Урокі манаха Сімяона» да 395-годдзя з дня нараджэння полацкага асветніка.
Дадатковыя цікавосткі — у філіяле музея, прысвечанага ручному ткацтву Паазер'я: выстава «Беларускі традыцыйны строй у мініяцюры» і гульня-квэст з прызамі.
Крыху бліжэй да Мінска — Сула і адмысловая праграма для тых, хто хоча бяспечна паказытаць свае нервы ў гэтыя дні пры дапамозе містычных легенд і аповедаў на лакацыях. А яшчэ наведнікаў завабліваюць факельным шэсцем — увечары павінна выглядаць вельмі інстаграмна.
Цяпер чытаюць
Чаму паліграф — не панацэя. Колькі агентаў ён бы выявіў у Каардынацыйнай радзе?9
Каментары
Там дзе ён трывалы і смачны, змарнуецеся ў чарзе.
Там дзе дармовы сьняданак нішчымны несмак чаргі няма, бо сэнсу няма