Еўрапарламент прапаноўвае два варыянты фармавання беларускай дэлегацыі ў Еўранесце.
Еўрапарламент прапаноўвае ўладам Беларусі два варыянты фармавання беларускай дэлегацыі ў парламенцкай асамблеі палітыкі Еўрасаюза «Усходняе партнёрства» (Еўранест).
Як зазначыў у інтэрв’ю польскай «Rzeczpospolita» ад 28 студзеня кіраўнік дэлегацыі Еўрапарламента па сувязях з Беларуссю, польскі дэпутат Яцак Пратасевіч, або ў Еўранест увойдуць
пяць дэпутатаў нацыянальнага сходу і пяць прадстаўнікоў апазіцыі, або ўсе дзесяць месцаў зоймуць толькі апазіцыянеры.
Пратасевіч нагадаў, што ў дачыненні да Беларусі дзейнічаюць шэраг санкцый, і яе прадстаўнікі, у адрозненне ад дэлегатаў іншых краін «Усходняга партнёрства» (Азербайджана, Арменіі, Грузіі, Малдовы і Украіны), могуць мець толькі статус назіральнікаў, а не членаў асамблеі. Паводле інфармацыі «Pzeczpospolita», афіцыйны Мінск даў еўрачыноўнікам зразумець, што формула «5+5» магчымая, калі беларускія ўлады
«будуць мець уплыў на адбор удзельнікаў ад апазіцыі». Аднак парламент ЕС на такі крок пакуль не пагаджаецца.
Як паведамлялася, у канцы лютага Мінск наведае азнаямленчая місія Еўрапарламента, якая плануе правесці сустрэчы з
прадстаўнікамі ўлады і грамадзянскай супольнасці.
Праграма «Усходняе партнёрства» ўключае 27 краін ЕС і шэсць дзяржаў‑партнёраў: Азербайджан, Арменію, Беларусь, Грузію, Малдову і Украіну.
Яна прадугледжвае палітычнае і эканамічнае збліжэнне з ЕС.
23 кастрычніка 2009 года ў Стакгольме была сфармавана рабочая група па стварэнні канцэпцыі парламенцкай асамблеі «Усходняга партнёрства» (Еўранест). Плануецца, што ў Еўранест увойдуць 60 дэпутатаў Еўрапарламента і 60 дэпутатаў з краін‑партнёраў (па 10 прадстаўнікоў ад кожнай).
Інаўгурацыйная канферэнцыя Еўранеста запланавана на 24 сакавіка.
Цяпер чытаюць
Расіянка расказвала пра глыбінную моц Лукашэнкі — цяпер яна ў слязах з'язджае з Беларусі14
Каментары