Літоўскі барэц выйграў бой на гульнях БРІКС, нават не ўдзельнічаючы ў спаборніцтвах. Цуды на расійскіх гульнях
На гульнях БРІКС у пятніцу прайшоў незвычайны бой у дысцыпліне «корэш» (барацьба на паясах) — на яго не прыйшоў ні адзін са спартсменаў. Але перамогу атрымаў літовец Андрус Мажэйка, піша «Агентство».
Як паказана на сайце гульняў БРІКС, Мажэйка быў адзіным спартсменам з Літвы, выступаў ён у вагавой катэгорыі да 85 кг. Першы бой на стадыі 1/4 фіналу ён прайграў барцу з Казахстана Адылету Жанбыршы, паколькі не зʼявіўся на спаборніцтва, у выніку чаго вылецеў у суцяшальную сетку турніру. Зрэшты, на відэа бою Мажэйкі таксама няма.
У суцяшальным паядынку літоўцу дастаўся румын Сцяпан Карасені, які таксама не зʼявіўся на спаборніцтвах.
Суддзі прысудзілі перамогу Мажэйку, дзякуючы чаму ён выйшаў у фінал, дзе змагаўся за 3-5-е месцы.
Тут літовец прайграў прадстаўніку Кыргызстана Анвару Муратбеку Уулу з лікам 0:5. «Агенцтву» не ўдалося знайсці відэа гэтага паядынку, каб зразумець, ці быў на ім Мажэйка.
Андрус Мажэйка (Andrius Mažeika) — рэальны барэц з Літвы. Літоўскае выданне LRT спрабавала звязацца з ім, каб даведацца, ці ўдзельнічаў ён у гульнях БРІКС, аднак датэлефанавацца не змагло.
У федэрацыі барацьбы Літвы выданню паведамілі, што ніхто не дэлегаваў спартсмена на спаборніцтвы ў Расію. Больш за тое, прэзідэнт Федэрацыі Гедрус Дамбраўскас заявіў, што апошні раз бачыў спартсмена больш за два гады таму і што той з пачатку 2021 года не займаецца спортам прафесійна.
Трэнер спартоўца ў Літве Сяргей Касымаў таксама паведаміў LRT, што Мажэйка ўжо тры гады не трэніруецца праз траўму спіны і не мог паехаць у Расею.
«Можа быць, яны фальсіфікуюць гэтыя пратаколы, каб паказаць, што ў іх удзельнічае больш краін. На 99,9% упэўнены, што ён туды не хадзіў, патэлефаную сам і даведаюся, ці быў ён там», — сказаў Касымаў.
У гутарцы з «Агенцтвам» Касымаў сказаў, што пакуль не разабраўся ў сітуацыі.
Гульні БРІКС праводзяцца ў Казані. Прапаганда падае іх як альтэрнатыву Алімпіядзе ў Парыжы, дзе расейскія спартоўцы выступяць у абмежаванай колькасці.
Падчас адкрыцця гульняў БРІКС было заяўлена, што ў іх возьмуць удзел больш за 90 краін. Аднак на сайце гульняў у 22 з іх у графе ўдзельнікі не пазначаны ніхто.
«Ён ненаедны». У чым сакрэт маладога галкіпера, дзякуючы якому зборная Грузіі ўзяла сваё першае ачко на топ-турніры?
На гульнях БРІКС каментатар заклікаў «русаў» не знаёміцца з «усякімі шмарамі»
Грузінскія фанаты на матчы Еўра-2024 запусцілі крычалку «Пуцін х**ло» — момант трапіў у трансляцыі «Матч ТВ» и «РТР-Беларусь» ВІДЭА
Цяпер чытаюць
Сын Сяргея Бульбы збірае грошы ў Польшчы, прыдумаўшы сабе біяграфію ветэрана і палітычнага ўцекача17
Каментары