Пра смерць 31-гадовага краязнаўцы з вёскі Пакуці пад Івянцом, стваральніка фэйсбук-суполкі «Наша Валожыншчына» Паўла Арлоўскага паведамілі ягоныя сваякі. Гэта быў чалавек незвычайнага лёсу: з дзяцінства зусім слабы целам, але да апошніх дзён жыцця вельмі моцны духам.
Павел Арлоўскі памёр у 31 год, але сам казаў, што лічыць сябе доўгажыхаром. Бо ў яго быў дыягназ міядыстрафія Дзюшэн, з якім людзі жывуць у сярэднім толькі да 27 гадоў.
«Мая хвароба мае на ўвазе паломку гена, з прычыны чаго арганізм не выпрацоўвае бялок, які адказвае за нармальнае функцыянаванне цягліц. З цягам часу цягліцы атрафуюцца, чалавек губляе магчымасць хадзіць, а потым і сядзець. Адбіваецца міядыстрафія Дзюшэн і на іншых органах. Асабіста ў мяне ёсць праблемы з сэрцам, з лёгкімі. І калі раней я мог перасоўвацца ў вазку сам, то пазней — толькі са старонняй дапамогай. Цяпер і гэта складана. Прасцей за ўсё ляжаць. Але мне не сядзіцца на месцы», — расказваў сам Павел у інтэрв'ю, дадзеным літаральна за некалькі месяцаў да смерці.
Хвароба была дыягнаставаная ў хлопчыка ў 1999 годзе, калі ён збіраўся ісці ў першы клас. Некалькі гадоў, пакуль яшчэ мог хадзіць, вучыўся ў Івянецкім доме-інтэрнаце для дзяцей з асаблівасцямі фізічнага развіцця, аднак пасля таго, як у сына цалкам перасталі працаваць ногі, бацькі прынялі рашэнне забраць Паўла дадому.
З таго часу ён займаўся толькі самаадукацыяй і дасягнуў у гэтым многага. Так, будучы 19-гадовым юнаком, ён самастойна вывучыў польскую мову, а пасля доўгі час выкладаў яе дыстанцыйна, пакуль ад хваробы не стала зусім цяжка гаварыць.
Акрамя выкладання польскай мовы, ён вельмі цікавіўся футболам і добра разбіраўся ў ім, займаўся краязнаўствам, калекцыянаваў манеты і банкноты.
Краязнаўствам Павел захапіўся яшчэ ў школе і з таго часу, пакуль хапала сілы і магчымасцяў, даследаваў розныя пытанні гісторыі сваёй малой радзімы і прапагандаваў іх праз інтэрнэт. Ён быў заснавальнікам папулярнай краязнаўчай суполкі ў фэйсбуку «Наша Валожыншчына».
Таксама ён стварыў у сацсетках суполку для людзей з міядыстрафіяй Дзюшэна і нават арганізоўваў у аграсядзібе «Налібоцкія васількі» Валожынскага раёна афлайн-сустрэчы людзей з такім дыягназам.
Цяпер чытаюць
Выбітыя дзверы, маскі-шоу, затрыманне топ-менеджараў. Пачаўся пагром «Еўраопта»7
Каментары