Новы прэзідэнт Ірана прыняў прысягу пад скандаванне «Смерць Амерыцы і Ізраілю»
Аднак Масуд Пезешкіян паабяцаў палепшыць сувязі з замежнымі краінамі і аслабіць абмежаванні сацыяльных свабод унутры краіны.
Новы прэзідэнт Ірана Масуд Пезешкіян, які перамог на датэрміновых выбарах пасля гібелі ў авіякатастрофе прэзідэнта Раісі, прыняў прысягу, паабяцаўшы палепшыць сувязі з замежнымі краінамі і аслабіць абмежаванні сацыяльных свабод унутры краіны, піша Reuters.com.
«Мы будзем імкнуцца да канструктыўнага і эфектыўнага ўзаемадзеяння са светам, заснаваным на годнасці, мудрасці і мэтазгоднасці», — сказаў ён.
Яго перамога падняла надзеі — Пезешкіян лічыцца рэфармістам (прадстаўнік ліберальнага крыла) — на адлігу ў антаганістычных адносінах Ірана з Захадам, што можа стварыць магчымасці для паслаблення яго ядзернага супрацьстаяння з сусветнымі дзяржавамі.
Але Пезешкіян уступае на пасаду падчас эскалацыі напружанасці на Блізкім Усходзе з-за канфлікту Ізраіля з ХАМАС і трансгранічных баявых дзеянняў з саюзнікам Ірана «Хезбалой» у Ліване. Іран абвінаваціў ЗША ў падтрымцы таго, што ён называе «ізраільскімі злачынствамі ў Газе».
«Тыя, хто пастаўляе зброю, якая забівае дзяцей, не могуць вучыць мусульман гуманнасці», — сказаў Пезешкіян пад скандаванне «Смерць Амерыцы» і «Смерць Ізраілю».
На цырымоніі прысутнічалі лідары ХАМАС і «Ісламскага джыхаду», а таксама высокапастаўленыя прадстаўнікі еменскіх хусітаў і ліванскай «Хезбалы».
Пезешкіян, як чакаецца, назаве склад свайго кабінета на працягу двух тыдняў.
Аднак вырашальнае слова ва ўсіх дзяржаўных справах, уключаючы замежную і ядзерную палітыку, у Іране мае вярхоўны лідар аятала Алі Хаменеі. Ён таксама павінен зацвярджаць кандыдатуры Пезешкіяна на ключавыя пасады ва ўрадзе.
Цяпер чытаюць
Сын Сяргея Бульбы збірае грошы ў Польшчы, прыдумаўшы сабе біяграфію ветэрана і палітычнага ўцекача49
Каментары