Шэсць апазіцыйных партый Паўднёвай Карэі падрыхтавалі законапраект аб імпічменце прэзідэнту
Дакумент плануюць унесці ў парламент заўтра.
Шэсць апазіцыйных партый Паўднёвай Карэі падрыхтавалі законапраект аб імпічменце прэзідэнту краіны Юн Сок Елю, паведамляе агенцтва «Рэнхап».
Дакумент плануюць унесці ў парламент заўтра, 5 снежня, і ў наступныя два дні правесці па ім галасаванне. Для прыняцця законапраекта спатрэбіцца не менш за дзве траціны, або 200, галасоў дэпутатаў. У апазіцыі, прадстаўленай у парламенце сям'ю партыямі, ёсць толькі 192 мандаты.
Раней паведамлялася, што апазіцыйныя партыі таксама збіраюцца абвінаваціць Юна ў дзяржаўнай здрадзе. На іх думку, увядзенне ваеннага становішча, падчас якога вайскоўцы паспрабавалі захапіць парламент, раўназначна мяцяжу і выходзіць за рамкі судовай недатыкальнасці прэзідэнта.
Аб увядзенні надзвычайнага рэжыму было абвешчана ў аўторак вечарам. Указ, які дзейнічаў шэсць гадзін, забараняў працу палітычных партый, пратэсты, забастоўкі, уводзіў цэнзуру і ваенна-палявыя трыбуналы з правам на вынясенне смяротнага прысуду, паведамляе Радыё Свабода.
Перад будынкам парламента сабраліся пратэстоўцы — больш за пяць тысяч, паводле ацэнак апазіцыі. Дэпутаты проста падчас штурму будынка вайскоўцамі прагаласавалі за адмену рашэння прэзідэнта. Пасля гэтага ён па законе быў вымушаны адмяніць указ.
Цяпер чытаюць
Сёстры Груздзевы драматычна расказалі, як іх выкінуў за дзверы міністр культуры Руслан Чарнецкі. «Як сабак»16
Каментары
А в Беларуси строят КНДР.