«Толькі бізнэс, нічога палітычнага». Еўрапейскія бізнэсмены прыглядаюцца да падсанкцыйнай Беларусі
Крыніцы ў дзелавых колах расказалі выданню Office Life, што ў апошнія месяцы ў Беларусі фіксуецца прыкметны прыток замежных інвестараў або іх прадстаўнікоў. Прытым калі ваяжамі прадпрымальнікаў з Расіі, Кітая ці Турцыі нікога не здзівіш, то такой вялікай колькасці візітаў еўрапейскіх бізнэсменаў не назіралася, як сцвярджаецца, з дакавідных часоў.
Ва ўмовах санкцый некаторыя еўрапейскія кампаніі ці пайшлі з Беларусі, ці спынілі інвестыцыі. Зменшыліся і дзелавыя кантакты. Аднак сёлета, паводле інфармацыі Office Life, цікавасць да Беларусі з боку еўрапейцаў узрасла.
Напрыклад, Беларусь наведвалі італьянскія прадпрымальнікі, якія спецыялізуюцца на рашэннях у галіне сельскай гаспадаркі. Яны нібыта разглядаюць магчымасць лакалізацыі вытворчасці ў Беларусі. Іх прыцягвае не толькі аграпрамысловы сектар Беларусі, але і ў цэлым рынак ЕАЭС.
Былі ў Мінску і сербскія бізнэсмены. Сербія хоць і далучылася да санкцый ЕС, але з'яўляецца адзінай краінай у Еўропе, у якой дзейнічае пагадненне аб зоне свабоднага гандлю з краінамі Еўразійскага эканамічнага саюза. Сербы хацелі пашырыць супрацоўніцтва ў такіх сферах, як будаўніцтва, сельгастэхніка, прадукты харчавання і інш.
Паводле інфармацыі Office Life, гасцявала ў беларускай сталіцы і група інвестараў з Нарвегіі. Яны думаюць наладзіць у Беларусі перапрацоўку беларускай драўніны, а гатовую прадукцыю пастаўляць выключна на экспарт.
Былі ў еўрапейскага бізнесу кантакты і з рэзідэнтамі Парка высокіх тэхналогій.
Крыніцы ў юрыдычных кампаніях пацвярджаюць, што сёлета назіраецца рост візітаў еўрапейскіх дзелавых колаў у Беларусь.
«Гэтай восенню ў Мінск наведваліся як самі ўласнікі, так і іх прадстаўнікі. Нельга сказаць, што ва ўсіх ёсць адна выразна выяўленая мэта. Кожны пераследуе свае інтарэсы. У некаторых тут застаўся бізнэс. Яны разважаюць, што з ім рабіць — прадаваць або пачакаць.
Прыход да ўлады ў ЗША Трампа дае надзею, што санкцыі могуць аслабнуць, а беларускія ўлады здымуць абмежаванні на продаж і выплату дывідэндаў,
— кажуць суразмоўцы. — Хапае і тых, хто быў упершыню ў Беларусі. Яны зацікаўленыя пастаўляць тавары на рынкі Беларусі і Расіі.
Некаторыя гатовыя гандляваць «хадавой» беларускай прадукцыяй. Санкцыі — гэта не мае значэння. У іх эканоміка [паставак] складваецца. Толькі бізнэс, нічога палітычнага.
Што тычыцца інвестыцый, то цяпер толькі адзінкі гатовыя ўкладаць грошы ў праекты ў Беларусі. Нам вядомыя такія прыклады. Але пакуль усё на ўзроўні размоў. І, як правіла, у такіх праектах еўрапейскія прадпрымальнікі бяруць у долю мясцовых партнёраў. Ну альбо беларусы прыцягваюць еўрапейцаў і адкрываюць сумесную кампанію.
Калі абагульніць: цікавасць у еўрапейцаў прысутнічае, але па аб'ектыўных прычынах да ўзроўню 2018-2019 гадоў яшчэ далёка».
Самым дарагім маладым стартапам у свеце прызналі кампанію, якую заснаваў беларус
«Трэба купляць латарэйны білет». Стваральнік кампаніі Flo падзяліўся сакрэтам поспеху
Вялікабрытанія раскрыла буйную міжнародную сетку па адмыванні крыптавалюты для ўзбагачэння Крамля і аперацый расійскіх шпіёнаў у Еўропе
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім12
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім
Бабарыка і Калеснікава пагаварылі з Інгай Ругінене і заклікалі Літву «далучыцца да дыпламатычных намаганняў ЗША» і «не прапусціць акно магчымасцей»3333
Каментары