Продажы шампанскага ў свеце падаюць. Прычына — змена звычак і палітычная нестабільнасць
Асацыяцыя вытворцаў шампанскага заявіла, што змяненне звычак і змрочная сітуацыя ў свеце негатыўна адбіваюцца на продажах французскага шампанскага, пастаўкі якога ў мінулым годзе скараціліся амаль на 10%.
Спажыўцы на найважнейшых рынках, такіх як ЗША і Францыя, скарацілі спажыванне элітных напояў, паколькі эканамічная і палітычная нестабільнасць пагоршыла настрой на вечарынках, піша The Guardian.
«Шампанскае — гэта сапраўдны барометр настрою спажыўцоў», — сказаў Максім Тубар, прэзідэнт Генеральнага сіндыката вінаградараў і сустаршыня Champagne Committee.
«Цяпер не час святкаваць, улічваючы інфляцыю, канфлікты па ўсім свеце, эканамічную нявызначанасць і палітычнае чаканне на некаторых найбуйнейшых рынках шампанскага, такіх як Францыя і Злучаныя Штаты».
Больш даступныя альтэрнатывы, уключаючы прасека, ангельскія ігрыстые віны і крэман, усё часцей выцясняюць шампанскае сярод спажыўцоў, а попыт на французскае пеністае прэміум-класа ўпаў да самага нізкага ўзроўню больш чым за два дзесяцігоддзі. У апошнія гады недарагія алкагольныя напоі сталі больш канкурэнтаздольнымі з пункту гледжання якасці.
Усё больш даных сведчыць пра тое, што пакаленне Z і міленіялы на ключавых рынках, такіх як ЗША, адмаўляюцца ад алкаголю, часта аддаючы перавагу безалкагольным кактэйлям і марыхуане, у той час як бэбі-бумеры выходзяць на пенсію і трацяць менш на віно.
У ліпені мінулага года французскія вытворцы шампанскага распарадзіліся скараціць колькасць сабранага вінаграду пасля таго, як продажы ўпалі больш чым на 15% у першай палове 2024 года. Па даных Камітэта шампанскіх вінаў, аб'ём паставак за ўвесь год знізіўся на 9,2% у параўнанні з 2023 годам і склаў 271,4 млн бутэлек.
У 2022 годзе попыт на шампанскае рэзка ўзрос пасля пандэміі, калі аб'ём паставак дасягнуў 326 млн бутэлек, але з тых часоў ён пачаў зніжацца. У 2023 годзе было адгружана каля 299 млн бутэлек, што азначае зніжэнне больш чым на 8%.
Ураджай 2024 года ў французскім рэгіёне Шампань ужо пацярпеў ад замаразкаў і вільготнага надвор'я, што ўзмацніла паражэнне каштоўных вінаградных лоз цвіллю.
Цяпер чытаюць
Лукашэнка быў у Маскве без георгіеўскай стужкі. Наяўнасць або адсутнасць стужак падзяліла гасцей парада на дзве групы10
Каментары