Жанчына хацела прадаць рэчы на «Куфры» і ледзь не засталася без грошай
Жыхарка аднаго з абласных цэнтраў Вольга (імя зменена з меркаванняў бяспекі) вырашыла прадаць дзіцячыя рэчы, якія ўжо не патрэбныя яе дзіцяці. Аб'явы жанчына выставіла на «Куфры». Сярод прадметаў былі і нятанныя, накшталт дзіцячага крэсла. Жанчыне напісала патэнцыйная пакупніца, пасля камунікацыі з якой Вольга ледзь не страціла грошы. Пра незвычайны спосаб махлярства яна расказала «Люстэрку».
З прапановай купіць крэсла пакупніца напісала Вользе ў вайбер. Яна адразу пагадзілася на ўсе ўмовы. Але паколькі нібыта не можа забраць крэсла сама з-за маленькага дзіцяці з інваліднасцю, прапанавала пасля аплаты аформіць дастаўку праз «Еўрапошту».
«Я думала, што ўсё будзе, як яна пісала: адразу прыйдуць грошы, а кур'ер днямі забярэ крэсла», — кажа Вольга.
Але пакупніца сцвярджала, што зараз жа аплаціць і крэсла, і дастаўку. Праўда, так і не спыталася нумар карты, каб перавесці сродкі. Затое даслала спасылку на сайт, візуальна ідэнтычны сайту «Еўрапошты», і запэўнівала, што ўсё можна зрабіць з яго дапамогай. Нібыта трэба ўвесці даныя сваёй карты (уключаючы CVV-код) і націснуць кнопку «Атрымаць грошы».
«Я не працавала ніколі з «Еўрапоштай» і падумала, што там праўда ёсць такая функцыя», — тлумачыць жанчына.
На сумневы Вольгі пакупніца адказвала, што ўсё правільна, што яна ўжо перавяла грошы праз гэтую сістэму і вярнуць іх не можа. Таму нібыта не застаецца іншага выйсця, акрамя як зарэгістравацца.
«Увогуле, я зайшла на сайт, увяла нумар карты і CVV. Але ў глыбіні душы ўсё адно сумнявалася, таму спачатку перавяла амаль усе сродкі на іншы рахунак, — расказвае Вольга. — Тым больш што там трэба было ўвесці рэшту на карце, я такога яшчэ нідзе не бачыла».
Пасля таго, як сістэма не прыняла карту жанчыны, пакупніца стала настойліва прасіць увесці іншую, клялася, што плацеж прайшоў, а адмяніць яна яго не можа. Тады беларуска папрасіла пацвярджэнне аплаты:
«Я канчаткова зразумела, што гэта падман, калі яна прапанавала ўвесці даныя другой карты. А пасля таго як я сказала, што яе няма і папрасіла даслаць скрыншот чэка, гэтая дзяўчына перастала адказваць. І ў выніку проста заблакавала мяне».
На спробу падману Вольга адрэагавала спакойна. Па-першае, грошы не знялі, таму проста прыйшлося заблакаваць карту і завесці новую. А па-другое, разважае яна, калі «ёсць Бог на гэтым свеце», наўрад ці атрымаецца доўга беспакарана падманваць людзей, прыкрываючыся дзіцём з інваліднасцю.
Ашуканцы часта ствараюць сайты, візуальна ідэнтычныя банкам, інтэрнэт-крамам або іншым сэрвісам. Каб засцерагчы сябе, перад уводам даных карты ўважліва правярайце адрас сайта — ён можа адрознівацца ад арыгінальнага ўсяго на некалькі знакаў.
Цяпер чытаюць
Памятаеце Асоль Слівец? Жыццё фрыстайлісткі змянілася да непазнавальнасці, цяпер яна Абігаль1
Каментары