Раённы суд Пецярбурга прыгаварыў 19-гадовую Дар’ю Козыраву да двух гадоў і васьмі месяцаў калоніі па абвінавачанні ў паўторнай «дыскрэдытацыі» расійскай арміі, піша Бі-бі-сі.
Абвінавачанне патрабавала для Козыравай шэсць гадоў пазбаўлення волі. У суд дзяўчына, якая чакала прысуду на волі, прыйшла з торбай рэчаў для СІЗА.
Крымінальная справа аб «дыскрэдытацыі» арміі супраць Козыравай была распачатая ў лютым 2024 года. Гэта адбылося пасля таго, як у другую гадавіну расійскага ўварвання ва Украіну яна наклеіла на помнік украінскаму паэту Тарасу Шаўчэнку лісток з радкамі з ягонага верша «Запавет»:
- Поховайте та вставайте
- Кайдани порвіте
- І вражою злою кров’ю
- Волю окропіте.
Дзяўчыну затрымалі проста каля помніка. Спачатку затрыманне было аформлена паводле адміністрацыйнага артыкула аб непадпарадкаванні супрацоўніку паліцыі, а затым пачаліся следчыя дзеянні ўжо ў межах крымінальнай справы.
Яшчэ да затрымання каля помніка Шаўчэнку Козыраву штрафавалі па адміністрацыйным артыкуле аб «дыскрэдытацыі» арміі за пост пра вайну ў сацсетцы «УКантакце».
З-за гэтай адміністрацыйнай справы Козыраву адлічылі з першага курса медыцынскага факультэта СПбДУ. У жніўні 2024 года стала вядома, што Козыравай дадалі новае абвінавачанне па крымінальным артыкуле аб «дыскрэдытацыі» — за інтэрв’ю, якое актывістка дала праекту «Север.Реалии».
З лютага 2024 года Козырава знаходзілася ў СІЗА, аднак у лютым гэтага года ёй змякчылі меру стрымання, прызначыўшы «забарону пэўных дзеянняў».
Справу Козыравай аб паўторнай «дыскрэдытацыі» арміі суд пачаў разглядаць яшчэ ў жніўні мінулага года.
У лістападзе дзяўчына, выступаючы ў судзе, расказала, што Тарас Шаўчэнка — яе любімы паэт і ў яго вершах не можа быць «дыскрэдытацыі» расійскай арміі, бо ён жыў у той час, калі Расійская Федэрацыя не існавала.
У сваім апошнім слове Козырава працытавала верш Шаўчэнкі і сказала, што, апынуўшыся ў наш час, паэт бы не здзівіўся: «Дзіўная рыса расійскай гісторыі. Які б тут ні панаваў рэжым, быццам бы рэлігія гэтага рэжыму не дазваляе проста ўзяць і пакінуць Украіну ў спакоі».
У снежні 2022 года Козырава, яшчэ будучы школьніцай, была затрыманая за нанясенне надпісу «Забойцы, вы разбамбілі яго. Іуды» на інсталяцыю «Два сэрцы», устаноўленую ў Пецярбургу ў гонар Марыупаля.
Тады Козыраву абвінавацілі ў наўмысным пашкоджанні маёмасці, аднак з тых часоў ніякіх следчых дзеянняў па гэтай справе не праводзілася, а ў 2024 годзе па ёй мінулі тэрміны даўнасці.
Выбітыя дзверы, маскі-шоу, затрыманне топ-менеджараў. Пачаўся пагром «Еўраопта»13
Каментары
Хай лани широкополі
І Дніпро, і кручи
Стануть вам поперек горла,
москалі їб*чі!