Прэзідэнт ЗША Дональд Трамп заявіў, што падоўжыў тэрмін перамоваў па тарыфах з Еўрапейскім саюзам да 9 ліпеня пасля размовы з кіраўніцай Еўракамісіі Урсулай фон дэр Ляен, піша Бі-бі-сі.
«Сёння мне патэлефанавала Урсула фон дэр Ляен, старшыня Еўрапейскай камісіі, і папрасіла працягнуць тэрмін, устаноўлены на 1 чэрвеня ў дачыненні 50-працэнтнага тарыфу. […] Я пагадзіўся на падаўжэнне да 9 ліпеня 2025 года», — напісаў ён у сваёй сацыяльнай сетцы Truth Social.
Фон дэр Ляен напісала ў сацсетцы X, што ў яе адбылася «добрая» размова з Трампам. «Еўропа гатовая да хуткага і рашучага прасоўвання перамоваў. Каб дасягнуць добрай здзелкі, нам патрэбны час да 9 ліпеня», — заявіла яна.
У сакавіку Трамп абвясціў пра ўвядзенне 20-працэнтных тарыфаў на большасць тавараў ЕС, але затым знізіў іх удвая да 8 ліпеня, пакуль ідуць перамовы. У пятніцу Трамп выказаў незадаволенасць тэмпамі абмеркаванняў і прыгразіў увесці 50-працэнтныя пошліны.
Міністр фінансаў Германіі Ларс Клінгбайль у нядзелю заклікаў да перамоваў з Вашынгтонам, заявіўшы, што ён размаўляў пра гэта з кіраўніком амерыканскага Мінфіна Скотам Бэсэнтам.
«Нам патрэбны не правакацыі, а сур’ёзныя перамовы, — сказаў ён газеце Bild. — Амерыканскія тарыфы пагражаюць эканоміцы ЗША ў такой жа ступені, як і эканоміцы Германіі і Еўропы».
Трамп увёў тры пакеты тарыфаў: 25-працэнтныя на сталь і алюміній і на аўтамабілі, а затым 20-працэнтны «адказны» збор на ўвесь імпарт, які быў прыпынены ў чаканні перамоваў. Пры гэтым базавыя 10-працэнтныя стаўкі застаюцца ў сіле.
Еўракамісар па гандлі Мараш Шэфчавіч, які ў пятніцу правёў перамовы са сваімі амерыканскімі калегамі, заявіў, што блок «прыхільны дасягненню здзелкі», але гандлёвыя сувязі павінны грунтавацца на «ўзаемнай павазе, а не на пагрозах».
Брусель абвясціў пра планы ўвесці тарыфы на амерыканскія тавары, калі перамовы не прывядуць да заключэння здзелкі.
Цяпер чытаюць
Ціханоўская: Дзеці не пераехалі ў ЗША, а проста часова будуць з татам дзеля бяспекі14
Каментары