Келаг: На перамовах у Стамбуле будуць прадстаўнікі ЗША, Германіі, Вялікабрытаніі і Францыі
Перашкодай для правядзення перамоў Келаг называе адсутнасць расійскай версіі так званага «мемарандума».
Спецыяльны пасланнік прэзідэнта ЗША Дональда Трампа генерал Кіт Келаг паведаміў, што на наступным раундзе мірных перамоў паміж Украінай і Расіяй, якія запланаваныя на 2 чэрвеня ў Стамбуле, чакаецца ўдзел дарадцаў па бяспецы з ЗША, Францыі, Германіі і Вялікабрытаніі. Пра гэта Кіт Келаг сказаў у інтэрв'ю ABC News.
Келаг паведаміў, што на перамовах у Стамбуле да ўкраінскай і амерыканскай дэлегацый далучацца дарадцы па бяспецы з Германіі, Францыі і Вялікабрытаніі. Менавіта гэтая група, паводле яго слоў, раней удзельнічала ў фарміраванні ўкраінскага варыянта «мемарандума» з 22 пунктаў падчас сустрэч у Лондане і Парыжы.
Аднак перашкодай для правядзення перамоў Келаг называе адсутнасць расійскай версіі так званага «мемарандума».
«Калі прэзідэнт Трамп гаварыў з Пуціным, той сказаў, што на працягу тыдня перадасць свой мемарандум. Але мы дагэтуль яго не бачылі. Украінцы яго не бачылі. Я спытаў у кіраўніка апарата прэзідэнта Украіны Андрэя Ермака, ці бачыў ён яго. Ён адказаў, што не. Я таксама гаварыў з галоўным украінскім перамоўшчыкам — Рустэмам Умеравым, які будзе весці перамовы ў Стамбуле на наступным тыдні. Ён таксама не бачыў мемарандума», — сказаў ён.
Келаг таксама падкрэсліў, што першачарговая мэта перамоў — дасягненне ўсеахопнага спынення агню ў паветры, на сушы, моры і ўдараў па грамадзянскай інфраструктуры.
Цяпер чытаюць
Ці атрымаецца ва ўладаў вярнуць дзяцей мігрантаў у беларускія школы? Наўрад ці, але яны спрабуюць — прымусова6
Каментары