Дуда: Расія выдыхаецца, а мы мацнеем. А наконт Украіны ў НАТА я з Наўроцкім пагавару
Прэзідэнт Польшчы Анджэй Дуда ў інтэрв'ю літоўскаму тэлебачанню супакоіў наконт стаўлення новаабранага прэзідэнта Караля Наўроцкага да Украіны. Ён таксама расказаў, што думае рабіць пасля прэзідэнцтва.
2 чэрвеня прэзідэнт Польшчы Анджэй Дуда ўзяў удзел у сустрэчы «Бухарэсцкай дзявяткі» — саміта дзяржаў усходняга фланга НАТА. Сустрэча адбылася ў Вільні, і ў ёй удзельнічалі таксама прэзідэнт Украіны Уладзімір Зяленскі і генеральны сакратар НАТА Марк Рутэ.
Дуда быў у выдатным настроі: напярэдадні, 1 чэрвеня, на прэзідэнцкіх выбарах у Польшчы перамог ягоны палітычны саюзнік Караль Наўроцкі.
У інтэрв'ю літоўскаму грамадскаму тэлебачанню LRT Дуда супакойваў наконт замежнапалітычных установак Наўроцкага.
Наўроцкі-прэзідэнт будзе ўспрымаць рэчы інакш, чым Наўроцкі-кандыдат
«Спадар Наўроцкі заяўляў, што не падтрымлівае ўступлення Украіны ў НАТА і Еўрапейскі саюз. Ці азначае гэта, што мы ўбачым новую дынаміку ў адносінах паміж Польшчай і Украінай?» — запытала літоўская журналістка.
«Я перагавару з ім пра гэта, бо, як вы ведаеце, мая пазіцыя па гэтым пытанні іншая. Яна вынікае з майго прэзідэнцкага досведу — амаль дзесяці гадоў на пасадзе прэзідэнта Польшчы, яна вынікае з усіх ведаў, назапашаных за гэтыя гады, — адказаў Дуда.
— Упэўнены, што ён таксама ўважліва прааналізуе міжнародную сітуацыю, становішча Украіны і польска-ўкраінскія адносіны, калі заступіць на пасаду. Як мы кажам у Польшчы: punkt widzenia zależy od punktu siedzenia, твая пазіцыя залежыць ад таго, дзе ты сядзіш — а крэсла прэзідэнта Рэспублікі Польшча вельмі спецыфічнае месца, і з яго свет выглядае трохі інакшым».
Прэзідэнт Польшчы таксама заклікаў не драматызаваць пагрозы з усходу.
Расія выдыхаецца
«Восенню каля нашых межаў пройдуць вайсковыя вучэнні «Захад». Пасля аналагічных вучэнняў у 2021 годзе Расія напала на Украіну. Як вы думаеце, наколькі імаверна, што Расія вырашыць атакаваць Польшчу ці Літву падчас гэтых вучэнняў ці ў найбліжэйшы час?» — спытала журналістка.
«Не думаю, што так, — супакоіў Дуда. — Вядома, нехта скажа: «Ніколі не кажы ніколі», але мы рыхтуемся, умацоўваем патэнцыял стрымлівання, мадэрнізуем армію, каб быць у бяспецы. Але найважнейшае — гэта быць упэўненымі, што на нас ніхто не нападзе, што гэты патэнцыял будзе настолькі магутны, што ні ў каго не будзе спакусы яго выпрабаваць».
Мы, сказаў Дуда, «становімся мацнейшымі, а Расія слабее, бо штодня страчвае свае ўзброеныя сілы ў баях з Украінай, у апошнія дні яна таксама панесла вялікія страты ў вайсковай тэхніцы і людзях».
«Калі гаварыць пра напад на Украіну, Расія выдыхаецца як у плане вайсковай інфраструктуры, так і чалавечага фактару — гэта вельмі сур’ёзна», — адзначыў прэзідэнт Польшчы.
«Таму я не думаю, што сёння Расія здольная атакаваць якую-небудзь іншую краіну», — падсумаваў ён.
Ён таксама адзначыў, што спакойна глядзіць на пытанне захавання амерыканскай прысутнасці ў Еўропе і гаварыў з прэзідэнтам Трампам пра стварэнне моцнай амерыканскай вайсковай базы ў Польшчы, якая б стала плацдармам і для абароны балтыйскіх краін.
Цяпер мігранцкі крызіс 2021-га ўспрымаецца падрыхтоўкай да вайны
У той жа час ён прызнаў, што «Расія сапраўды ажыццяўляе розныя гібрыдныя атакі — умела і ў самых разнастайных формах».
«На маю думку, да гэтага можна аднесці і атаку на нашы межы, якую тэарэтычна ажыццяўляе Беларусь, але насамрэч мы цудоўна ведаем, хто за ёй стаіць. Хачу вам нагадаць, што яна цягнецца ўжо шмат гадоў — фактычна з канца лета 2021 года, і з пазіцыі сённяшняга дня тыя падзеі ўспрымаюцца як падрыхтоўка Расіяй глебы перад шырокамаштабнай агрэсіяй супраць Украіны», — сказаў ён.
«Я ў самым росквіце сіл як палітык»
Прэзідэнтам Польшчы нельга быць больш за два тэрміны: «Канстытуцыя Рэспублікі Польшча ў гэтым пытанні адназначная». «Таму я спакойна перадам прэзідэнцкія паўнамоцтвы свайму пераемніку», — кажа ён.
Што Дуда будзе рабіць пасля прэзідэнцтва? Ён стаў кіраўніком Польшчы маладым.
«Мне 53 гады, і, калі гаварыць пра палітыку, я ўсё яшчэ малады. Скажам так, у самым росквіце сіл як палітык, я насамрэч дасведчаны палітык, — сказаў Дуда і не выключыў, што застанецца ў палітыцы. — Я заўсёды адкрыты, калі нейкім разумным чынам Польшча захоча і надалей скарыстацца маімі ведамі і маёй гатоўнасцю працаваць на Рэспубліку Польшчу, на нашу нацыю, на наша грамадства».
У той жа час ён не выключыў і вяртання ў акадэмічную сферу.
«Я шмат гадоў адпрацаваў у Ягелонскім універсітэце, маю ступень доктара права са спецыялізацыяй у адміністрацыйным праве, добра знаёмы з пытаннямі дзяржаўнага права. Шмат гадоў працаваў у Канстытуцыйным судзе Польшчы, маю досвед выкладання ва ўніверсітэце. Так што маю шмат розных навыкаў», — усміхаецца прэзідэнт.
У Вільні чакаюць, што Наўроцкі працягне курс Дуды
У Вільні перамогу кандыдата, падтрыманага партыяй «Права і справядлівасць», успрынялі без драматызму.
Польскі правакансерватыўны лагер, да якога належыць Караль Наўроцкі, традыцыйна надае больш увагі сваім суседзям па Усходняй Еўропе. «Нарадоўцы» лічацца прыхільнікамі так званай «ягелонскай канцэпцыі», згодна з якой Польшча мае абапірацца на саюз з народамі, што пражываюць між Расіяй і Нямеччынай. Таму ў Вільні разлічваюць, што асабліва цесныя адносіны, якія склаліся між Анджэем Дудам і прэзідэнтам Літвы Гітанасам Наўседам, захаваюцца і пры новым гаспадару Бельведэра.
Каментары
Хаця, можа яны за антырасейскасць яго так не любілі?
[Зрэдагавана]