Арыштаваны чыноўнік, які мог стаць наступным міністрам аховы здароўя
Амбітны і перспектыўны начальнік камітэта аховы здароўя Мінска Ігар Юркевіч пагарэў на атрыманні хабару. Як стала вядома «Нашай Ніве», з канца мінулага працоўнага тыдня ён знаходзіцца ў СІЗА.
Ігар Юркевіч — адзін з топавых чыноўнікаў у медыцынскай сферы. З 2023 года ён займаў пасаду старшыні камітэта па ахове здароўя Мінгарвыканкама. Прычым трапіў на гэтую высокую пасаду другі раз — гэта вельмі рэдкая гісторыя.
Далейшая траекторыя яго кар'еры, у прынцыпе, была ясная: з пасады начальніка сталічнага камітэта здароўя наступная лагічная прыступка — гэта толькі міністр. Работнікі сістэмы і акружэнне разумелі, куды меціць Юркевіч, ды і сам ён гэтага не хаваў.
Ігар Юркевіч нарадзіўся ў 1976 годзе ў Століне, паходзіць з медыцынскай дынастыі. Яго бацька быў загадчыкам аддзялення ў раённай бальніцы, маці працавала там жа медсястрой.
Юркевіч з чырвоным дыпломам скончыў Гродзенскі медыцынскі ўніверсітэт, але размеркаваўся на малую радзіму. Пасля некалькіх гадоў працы ў Століне перабраўся ў Мінскую інфекцыйную бальніцу. У 2009-2011 Юркевіч быў у ёй галоўным урачом, пасля чаго пайшоў у чыноўнікі.
У 2011-2014 ён першы намеснік старшыні камітэта па ахове здароўя Мінгарвыканкама, у 2014-2017 — старшыня камітэта.
У 2017-2019 Юркевіч быў віцэ-мэрам Мінска, адказваў за сацыяльныя пытанні. Ён стараўся дэманстраваць сябе адкрытым чыноўнікам, катаўся з журналістамі на веласіпедах. Дый увогуле першае інтэрв'ю даваў незалежным медыя, за што пасля атрымліваў ад прапаганды. Разам з тым менавіта за подпісам Юркевіча прыходзіў адказ аб тым, што мемарыяльная шыльда да 100-годдзя БНР не будзе ўсталяваная.
У 2019-м Юркевіча выслалі антыкрызісным менеджарам у 6-ю клінічную бальніцу Мінска, дзе ён праседзеў кіраўніком да 2023 года.
І ўжо адтуль трыумфальна вярнуўся ў кіраўнікі камітэта аховы здароўя Мінгарвыканкама.
У Юркевіча ўсё пёрла, яго прозвішча ўсю вясну не знікала са стужкі БелТА: заробкі ў сталічнай ахове здароўя за 2024 склалі 110,46% ад узроўню 2023, тэмпы росту экспарта медыцынскіх паслуг перавыканалі план і выраслі на 109,7%, укамплектаванасць доктарскіх пасад вырасла да 95% усяго за год працы Юркевіча на пасадзе, дактары нібыта перасталі звальняцца, а ў 2025-м планавалася здаць шэсць новых будынкаў, у тым ліку — чатыры паліклінікі.
Але на мінулым тыдні нешта здарылася. Юркевіч перастаў з'яўляцца на рабоце і заходзіць у месенджары.
Як стала вядома суразмоўцам «Нашай Нівы», Юркевіча затрымалі пры атрыманні хабару. Ён знаходзіцца ў СІЗА.
Па абвінавачванні ў карупцыі чыноўніку можа пагражаць да 15 гадоў зняволення незалежна ад таго, якую суму ён атрымаў.
Галыгіна прымусілі апраўдвацца за зварот да сілавікоў у 2020-м17
Каментары