Сусветны банк прагназуе найгоршае дзесяцігоддзе для глабальнага росту з 1960-х гадоў

Сусветны банк апублікаваў справаздачу «Глабальныя эканамічныя перспектывы», згодна з якой сусветная эканоміка сутыкнецца з самым павольным дзесяцігоддзем глабальнага росту з 1960-х гадоў. Асноўнай прычынай такога запаволення называецца ўплыў тарыфаў, уведзеных Дональдам Трампам.

Згодна са справаздачай, як піша BBC, амаль дзве траціны краін свету скарацілі свой рост у параўнанні з апошнім прагнозам банка, які быў апублікаваны ў студзені да таго, як Дональд Трамп заняў пасаду. З таго часу ўвядзенне ім універсальнага 10-працэнтнага тарыфу на ўвесь імпарт у ЗША, а таксама больш высокіх тарыфаў на сталь і алюміній прывяло да падзення фінансавых рынкаў у пачатку красавіка.

Паводле экспертаў Сусветнага Банка, у 2025 годзе глабальная эканоміка вырасце на 2,3%, што на 0,4% ніжэй, чым прагназавалася ў студзені. Гэта самы нізкі тэмп з 2008 года, акрамя двух гадоў глабальнай рэцэсіі ў 2009 і 2020 гадах.

Чакаецца, што ў 2026-27 гадах рост унутранага попыту павысіць глабальны рост у сярэднім да 2,5 %. І гэта самы павольны тэмп за любое дзесяцігоддзе з 1960-х гадоў.

Сярод краін, чые рэйтынгі былі паніжаны ў дакладзе банка, Японія, Еўрапейскі Саюз і ЗША.

Аднак Сусветны банк не панізіў рэйтынг галоўнага канкурэнта ЗША — Кітая, які, па словах банка, меў дастатковую фінансавую стабільнасць, каб вытрымаць «значныя цяжкасці» ад глабальнай палітычнай нявызначанасці.

«На фоне павышанай нявызначанасці палітыкі і павелічэння гандлёвых бар'ераў глабальны эканамічны кантэкст стаў больш складаным», — пішуць аўтары справаздачы.

Банк папярэджвае, што ў выпадку павышэння тарыфаў з боку ЗША рост эканомікі можа яшчэ больш запаволіцца, а інфляцыя — узрасці.

Тарыфы могуць прывесці да таго, што «сусветны гандаль амаль спыніцца ў другой палове гэтага года, суправаджаючыся шырокім падзеннем даверу, узмацненнем нявызначанасці і крызісам на фінансавых рынках», адзначаецца ў дакуменце.

На жаль, як падкрэслівае ў сваёй прадмове галоўны эканаміст Сусветнага банка Індэрміт Гіл (Indermit Gill), «найбольш пацерпяць самыя бедныя краіны».

Да 2027 года ВУП на душу насельніцтва ў краінах з высокім узроўнем даходу будзе прыкладна такім жа, як і чакалася да пандэміі Covid-19. Але краіны, якія развіваюцца, будуць у горшым становішчы, іх узровень ВУП на душу насельніцтва будзе на 6% ніжэйшы. За выключэннем Кітая, гэтым краінам можа спатрэбіцца два дзесяцігоддзі, каб кампенсаваць страты 2020-х гадоў.

Аднак справаздача не прадказвае глабальную рэцэсію: верагоднасць яе ацэньваецца менш чым у 10%.

Гэтая ацэнка з’явілася пасля таго, як Арганізацыя эканамічнага супрацоўніцтва і развіцця таксама панізіла свой прагноз для сусветнай эканомікі: цяпер чакаецца рост толькі на 2,9% замест ранейшых 3,1%.

• 0
• 0
• 3
• 1
• 2
• 0
• 0
• 0