У былой псіхбальніцы ў Жодзішках цяпер выстаўляюць беларускіх мастакоў ФОТЫ
Дзверы гістарычнага будынка XVIII стагоддзя з незвычайным лёсам упершыню адчыніліся для шырокай публікі.
Псіхіятрычная бальніца ў Жодзішках Смаргонскага раёна размяшчаецца ў гістарычных будынках былога езуіцкага калегіума XVIII стагоддзя, які паўстаў тут пасля таго як кальвінскі збор, фундаваны родам Кішкаў, у выніку Контррэфармацыі быў перададзены католікам.
Пасля скасавання ордэна будынкі перайшлі ў прыватныя рукі, імі валодалі прадстаўнікі родаў Патоцкіх, Ласкарысаў і Малішэўскіх, пры шляхецкай сядзібе быў закладзены парк. У савецкі час тут дзейнічаў спачатку туберкулёзны санаторый, а з 1949 года — абласная псіхіятрычная бальніца, якая працавала да 2019-га.
У 2023 годзе будынкі псіхбальніцы былі выстаўлены на аўкцыён. Невядома, хто стаў новым уласнікам, але сюды вярнулася жыццё.
Нядаўна тут прайшоў арт-фестываль «Хто вы, пані незнаёмка?», арганізатарам выступіла аб’яднанне «Вячэра». У час фестывалю працавалі батлейка «Дом з марамі» і кірмаш рамёстваў, адбыўся паказ Мінскага абласнога драматычнага тэатра. Адкрыццё фестывалю планавалася на 30 жніўня, але праз дадатковыя ўзгадненні яго перанеслі на 13 верасня.
Будынак былога езуіцкага калегіума, які 70 гадоў служыў псіхіятрычнай бальніцай, стаў культурным цэнтрам. Адкрылася выстаўка «Вобраз», на якой беларускія мастакі прадставілі больш за 200 сваіх карцін.
Выстаўка працягвае працу, і яе наведвальнікі маюць магчымасць убачыць не толькі творы сучасных беларускіх мастакоў, але і адчуць асаблівую атмасферу месца. Карціны прадстаўлены ў памяшканнях, яшчэ не кранутых рамонтам: з аблупленымі сценамі, сколатай бальнічнай кафляй, савецкай алейнай фарбай, якая цяпер звісае змрочнымі лупінамі.
Гэтыя брутальныя інтэр’еры надаюць выстаўцы асаблівую, амаль тагасветную атмасферу: закінутая псіхіятрычная бальніца ў літаратуры і кіно часта паўстае як месца таямнічае і жахлівае.
Уваход на выстаўку вольны, экспазіцыя адкрыта з 12.00 да 19.00.
«Наша Нiва» — бастыён беларушчыны
ПАДТРЫМАЦЬУ Жодзішках прадаюць сядзібу з незвычайнай гісторыяй: ад барацьбы з пратэстантамі да псіхлякарні
Чаканні — рэальнасць. У Верхнім горадзе завяршаюць амбіцыйны комплекс у вельмі спрошчаным выглядзе ФОТЫ
$249 000 за гістарычны вайб. Які рамонт зрабілі ў сталінцы проста ў цэнтры Мінска
Таямніцы Мінскага замчышча: недабудаваны храм, які ставіць у тупік навукоўцаў, і маладая князёўна з касой і кветкавым вянком
Рэстаўратары аднавілі капліцу ў сядзібе Агінскіх. Яе раскрытыкавалі за недакладнасці
Каментары
Нялюдская нейкая саўдэпія