24 лістапада пасля перанесенага кардыёэмбалічнага інсульта памёр прафесар кафедры дыферэнцыяльнных ураўненняў і сістэмнага аналізу Беларускага дзяржаўнага ўніверсітэта, доктар фізіка-матэматычных навук Антон Садоўскі. Яму быў 81 год.
Антон Садоўскі нарадзіўся 7 лютага 1944 года ў вёсцы Красняны Мядзельскага раёна. У 1966 годзе скончыў з адзнакай матэматычны факультэт БДУ.
З 1967 па 1982 гады працаваў у БДУ, прайшоўшы шлях ад малодшага навуковага супрацоўніка да дацэнта кафедры вышэйшай матэматыкі і матэматычнай фізікі. З 1982 па 1999 гады працаваў у Гродзенскім дзяржаўным універсітэце, дзе быў дацэнтам і прафесарам кафедры матэматычнага аналізу, выконваў абавязкі кіраўніка кафедры. З 1999 года працаваў прафесарам кафедры дыферэнцыяльных ураўненняў і сістэмнага аналізу БДУ.
У 1969 годзе абараніў кандыдацкую дысертацыю, у 1996‑м — доктарскую. У 2006‑м яму было прысвоена званне прафесара.
Навуковыя інтарэсы Садоўскага — якасная тэорыя дыферэнцыяльных ураўненняў. Ён распрацаваў метады рашэння праблемы цэнтра і фокусу для аналітычных сістэм, у тым ліку для сістэм з нільпатэнтным цэнтрам і кубічнай сістэмай нелінейных ваганняў Куклеса. Вынікі ягоных даследаванняў атрымалі шырокае прызнанне ў матэматычнай супольнасці.
Вядомымі ў беларускім грамадстве сталі і ягоныя дзеці — журналістка Марыя Садоўская-Камлач і экс-дыпламат Андрэй Садоўскі.
Цяпер чытаюць
Дар’я Шманай двойчы трапляла ў аварыі ў Маскве на чужым «Мерсэдэсе»18
Каментары