На Кубе засталося запасаў нафты на два-тры тыдні

Амерыканская блакада Венесуэлы і ціск Вашынгтона на Мексіку пазбавілі Кубу двух асноўных і стабільных крыніц паставак нафты і мазуту, які выкарыстоўваецца для выпрацоўкі электраэнергіі. Пры цяперашнім узроўні спажывання і вельмі абмежаванай уласнай здабычы паліва сітуацыя выглядае крытычнай.

На думку эксперта кансалтынгавай кампаніі Teneo Нікаласа Уотсана, без новых паставак крызіс можа стаць настолькі глыбокім, што паставіць пад пагрозу само існаванне кубінскага рэжыму.

Паводле Kpler, у гэтым годзе Куба атрымала каля 84,9 тысячы бараляў нафты — усяго з адной пастаўкі з Мексікі. У сярэднім гэта прыкладна 3 тысячы барэляў у дзень, у той час як у 2025 годзе краіна імпартавала больш за 37 тысяч бараляў штодня. Калі дадаць студзеньскую пастаўку да прыкладна 460 тысяч бараляў, якія знаходзіліся ў сховішчах на пачатку года, запасаў хопіць усяго на 15—20 дзён, лічыць аналітык Kpler Вікторыя Грабенвёгер.

Акрамя нафты, на Кубе амаль скончыўся і мазут. Да сярэдзіны 2025 года яго фактычна адзіным пастаўшчыком заставалася Венесуэла, але апошні груз прыбыў яшчэ ў лістападзе.

11 студзеня, неўзабаве пасля апошняй пастаўкі з Мексікі і на фоне сілавых дзеянняў ЗША ў Венесуэле, Дональд Трамп публічна заявіў, што Куба больш не будзе атрымліваць нафту. На гэтым тыдні ён таксама адзначыў, што кубінскі рэжым «вельмі блізкі да калапсу».

Эксперт Тэхаскага ўніверсітэта Хорхе Піньён папярэджвае: калі ў найбліжэйшыя тыдні новыя пастаўкі не адновяцца, краіну чакае сур’ёзны эканамічны і энергетычны крызіс.

Пры гэтым Куба і без нафтавай блакады перажывае найцяжэйшы эканамічны спад з 1959 года. Паводле ацэнак дэмографа Карласа Альбісу-Кампаса, з 2020 года краіну пакінула каля чвэрці насельніцтва — больш за 2,7 мільёна чалавек.

Раней Венесуэла забяспечвала каля 40% патрэб Кубы ў нафце, прычым па льготных цэнах. Сітуацыя рэзка пагоршылася напрыканцы мінулага года, калі ЗША ўвялі марскую блакаду і пачалі перахоп танкераў з венесуэльскай нафтай. Адзін з захопленых караблёў вёз на Кубу больш за мільён бараляў.

Мексіка летась была галоўным пастаўшчыком нафты для Гаваны, аднак цяпер ЗША настойваюць на спыненні гэтых паставак. Мехіка апынуўся ў складаным становішчы з-за пагроз Вашынгтона і маючага адбыцца перагляду гандлёвага пагаднення паміж Мексікай, ЗША і Канадай.

Як адзначае мексіканскі энергетычны кансультант Гансала Монрой, Куба моцна залежала ад Венесуэлы, і калі цяпер пад ціскам ЗША Мексіка таксама спыніць экспарт, праблемы для вострава стануць надзвычай сур’ёзнымі.

Паводле звестак аналітычнага цэнтра Social Rights Observatory, каля 90% кубінцаў жывуць у крайняй беднасці, а 70% не могуць рэгулярна забяспечыць сябе нават адным паўнавартасным прыёмам ежы ў дзень. Большасць апытаных называе галоўнымі праблемамі дэфіцыт прадуктаў і пастаянныя адключэнні электраэнергіі, якія ў асобных рэгіёнах доўжацца да 18 гадзін і больш.

• 5
• 0
• 0
• 2
• 1
• 0
• 0
• 0