У Беларусі з-за небяспекі ўзнікнення пажараў адкладзена адкрыццё палявання на дзікіх птушак. Адпаведную пастанову аб пераносе тэрмінаў сезона палявання, які павінен быў пачацца 7 жніўня, прыняў урад, паведамілі ў Міністэрстве лясной гаспадаркі Беларусі.
У Мінлясгасе адзначылі, што сезон адкрыецца пасля заканчэння пажаранебяспечнага перыяду.
Як паведаміў начальнік аддзела паляўнічай гаспадаркі і пабочнага лесакарыстання Міністэрства лясной гаспадаркі Сяргей Шастакоў, перанос тэрмінаў палявання на дзікіх птушак на больш позні час дасць магчымасць забяспечыць спакойную абстаноўку ў лясах і на балотных угоддзях ва ўмовах анамальнай спякоты і высокай пажаранебяспечнай сітуацыі.
У Мінлясгасе было ўважліва прааналізавана становішча ў лясах за апошні тыдзень. Галоўным аргументам для пераносу тэрмінаў палявання стаў несуцяшальны прагноз аб павышэнні тэмпературы паветра да плюс 39 градусаў, у тым ліку і на 7 жніўня - плануемы дзень адкрыцця сезона палявання, а таксама павышэнне класа пажарнай небяспекі ў лясах да чацвёртага (высокага). "Усё гэта выклікала неадкладнае прыняцце дадатковых мер, накіраваных на папярэджанне, аператыўнае выяўленне і тушэнне лясных і тарфяных пажараў", - расказаў Сяргей Шастакоў.
У Мінлясгасе ўпэўнены, што аматары палявання з разуменнем паставяцца да рашэння аб пераносе тэрмінаў палявання. "Мы разаслалі адпаведныя пісьмы ў адрас паляўнічых гаспадарак з просьбай правесці сярод паляўнічых растлумачальную работу", - дадаў суразмоўца.
Цяпер чытаюць
«На канцэртах няма месца радыкальнаму нацыяналізму, агрэсіі і гвалту». Макс Корж выказаўся наконт скандалу, які разгарэўся пасля яго выступу ў Варшаве3737
Каментары