Амэрыканцы былі шакаваныя «Марозкам». Яны пісалі, што гэта «глючны наркаманскі фільм, які нельга паказваць дзецям», дзікунская казка са злым грыбам, які жыве ў хаце на лапах — і шызоідны кашмар не для ўсіх.
Марозка (Морозко)
Расея (СССР), 1964, каляровы, 84 хв.
Рэжысэр: Аляксандар Роў
Ролі выконваюць: Аляксандар Хвыля, Натальля Сядых, Эдуард Ізотаў, Іна Чурыкава, Георгі Міляр, Павал Паўленка.
Жанр: Дзіцячы фільм‑казка па сцэнару Мікалая Эрдмана і Міхаіла Волпіна
Адзнака: 8,79 (з 10)
Жыла‑была добрая дзяўчынка Насьця. Злая мачыха не любіла падчарку — і ўсяляк яе зводзіла. Аднойчы яна выправіла дзяўчыну замярзаць у зімовы лес. А яшчэ жыў у тых краёх хлопец Іван — вялікі выхваляка, за што й быў ператвораны ў мядзьведзя. Дапамог героям дзед Мароз. А злая мачыха і яе дачка былі пакараныя.
Старая мілая казка савецкага кіначараўніка Аляксандра Роў. І адмысловыя эфэкты зараз іншыя, і кампутары дадаюць сваё, але дзіцячы фільм не губляе свайго наіву й сьвежасьці.
Асаблівы шык карціны — гратэсковыя ролі выбітных актораў. Іна Чурыкава — у ролі тупой, злой і сквапнай дачкі, Георгі Міляр (Бэла Лугошы, Барыс Карлаф, Лон Чэйні і Робэрт Энглунд у адной асобе) — з найлепшай Бабай Ягой за сваю кар’еру.
Амэрыканцы былі шакаваныя «Марозкам». Яны пісалі, што гэта «глючны наркаманскі фільм, які нельга паказваць дзецям», дзікунская казка са злым грыбам, які жыве ў хаце на лапах — і шызоідны кашмар не для ўсіх.
Але абавязкова пакажыце яго сваім дзецям.
Фільм почасту паказваюць па тэлевізіі. Але пад Новы год дзеці могуць паглядзець стужку на вялікіх экранах. 30 сьнежня — у «Піянэры» а 10.20, 31 сьнежня — у «Доме кіно» ў 12.00.
Каментары