Экс-кандыдат у прэзідэнты Андрэй Саннікаў, які знаходзіцца ў зняволенні ў наваполацкай папраўчай калоніі № 10 заяўляе, што ў яго «ўсё больш-менш у парадку», і ўпэўнены, што «добры час» хутка вернецца.
«У мяне ўсё больш-менш у парадку, калі не звяртаць увагі на ненармальнасць самой сітуацыі. Зона цяжкая, але існаваць (а не жыць) прыходзіцца, нягледзячы ні на што», — гаворыцца ў лісце Андрэя Саннікава яго даверанай асобе па Магілёўскай вобласці на прэзідэнцкіх выбарах Віктару Болдзіну, прадастаўленым адрасатам.
Зняволены палітык з задавальненнем успамінае магілёўскія сустрэчы «і падчас збору подпісаў, і падчас кампаніі». «Сапраўды, як ты пішаш, — звяртаецца ён у лісце да Віктара Болдзіна, — добры час быў. Але ён хутка вернецца. Я ўпэўнены».
Экс-кандыдата ў прэзідэнты таксама парадавала навіна аб тым, што мнагадзетная магіляўчанка Наталля Шкадун, якая ў снежні 2010 года аб’яўляла галадоўку, патрабуючы паляпшэння жыллёвых умоў, атрымала кватэру. Саннікаў просіць перадаць ёй прывітанне, а таксама прывітанне жонцы Болдзіна Алене, усім сябрам і знаёмым.
Ліст Андрэя Саннікава датаваны 29 жніўня. На канверце стаіць штамп атрымання яго ў Магілёве 1 верасня.
Каментары