У Мінску пачынаюць уключаць ацяпленне
Пачнуць з садкоў, школаў, бальніцаў. Хутка справа дойдзе і да кватэраў.
Мінгарвыканкам прыняў рашэнне дазволіць з 11 кастрычніка ўключэнне ацяплення ў дзіцячых садах, школьных, лячэбна-прафілактычных, медыцынскіх установах, установах сацыяльнага забеспячэння, музеях, дзяржаўных архівах.
Такое рашэнне прынята з улікам неспрыяльнага прагнозу надвор’я.
У аддзеле энергетыкі Мінгарвыканкама таксама нагадалі, што паводле правіл, калі сярэдняя тэмпература паветра на працягу пяці дзён ніжэйшая за 10 градусаў, да цяпла падключаюцца спажыўцы 1-й катэгорыі: школы, дзіцячыя сады, бальніцы, паліклінікі і іншыя сацыяльныя ўстановы.
Спажыўцам 2-й катэгорыі (жылфонд, інтэрнаты, гасцініцы) цяпло падаецца,
калі сярэдняя тэмпература паветра на працягу пяці дзён не перавышае 8 градусаў. Цяпер жыллёвыя службы горада — у чаканні рашэння аб пачатку падачы цяпла.
Пашпарты гатоўнасці да работы ў
асенне-зімовы перыяд атрыманы на ўвесь жылы фонд, які знаходзіцца на балансе ЖРЭА. Цяпло падаецца ў дамы паэтапна — па 20% дамоў у дзень. Працэс расцягваецца прыкладна на тыдзень, таму што пастаўшчыкі цяпла («Мінсккамунцепласетка» і «Мінскія цеплавыя сеткі») не могуць адначасова ўкінуць у сетку вялікі аб’ём вады. Пасля ўключэння цяпла сістэмы ацяплення адрэгулююць. На гэта спатрэбіцца яшчэ прыкладна два тыдні.
Каментары