Юрый Чыж пачаў будаўніцтва гіпермаркета ў Каменнай Горцы. З літоўцамі?

Рэтэйлавыя сеткі ўсур’ёз падступаюцца да новага, вялізнага мікрараёна Каменная Горка. Непадалёку гатовая пачаць будаўніцтва «Алмі», ужо адкрыўся «Віталюр». Цяпер

каля аднайменнай станцыі метро, на скрыжаванні вуліц Прытыцкага і Кунцаўшчына пачалося будаўніцтва гандлёва-забаўляльнага комплексу.

Выкінуты «Гіпа»

Згодна з інвестыцыйнымі планамі Мінгарвыканкама, на скрыжаванні Прытыцкага-Кунцаўшчыны меўся быць пабудаваны гандлёва-забаўляльна цэнтр з гандлёвай плошчай не менш за 21 тысячу квадратных метраў. Гэта б быў адзін з самых вялікіх аб’ектаў у сталіцы. Для параўнання, «Карона» займае ўдвая меншую, а «Прасторы» — у тры з паловай разы меншую тэрыторыю. Інвестарам пазначаны англійскі «Белвілесдэн», іншымі словамі, на працягу некалькі гадоў адкрыўся б гіпермаркет «Гіпа». Участак для будаўніцтва быў выдзелены яшчэ некалькі гадоў таму, грамадству было прадстаўлена чатыры самыя розныя праекты, аднак, як выявілася цяпер,

дырэктар «Белвілесдэна» Алег Бараноўскі быў вымушаны аддаць перспектыўную пляцоўку.

Наступным прэтэндэнтам на месца называўся «Прастормаркет» Юрыя Чыжа.

Аднак мільянер ужо мае выдзеленую пляцоўку на скрыжаванні Прытыцкага і МКАДа — таксама ў Каменнай Горцы, але за кіламетр ад метро.

Літоўскія госці

Пакуль што на будоўлі не вісіць пашпарта аб’екта, на якім павінна знаходзіцца інфармацыя пра падрадчыка і выканаўцу працаў.

Па словах будаўнікоў, забаўляльны цэнтр будзе належыць адной з літоўскіх сетак.

Месяц таму агенцтва «Мінск-Навіны» распаўсюдзіла інфармацыю, што ў сталіцу прыйдзе літоўская сетка крамаў Maxima, якая прадстаўленая, у прыватнасці, у вядомым віленскім «Акропалісе». Пасля таго, як літоўцы нібыта абверглі гэтыя звесткі, чыноўнікі ўдакладнілі — у краіну прыйдзе іншая літоўская кампанія, «Глера Капа», уласнікі якой раней працавалі ў Maxima. А ў пачатку месяца Maxima усё ж зарэгістравала даменнае імя сайта maximabelarus.by, ускосна пацвердзіўшы свае намеры выйсці на беларускі рынак. Ці насамрэч на Каменнай Горцы з’явіцца самы вядомы літоўскі гіпермаркет, ці то іншая сетка, «Наша Ніва» паспрабуе даведацца ў Мінгарвыканкаме ў найбліжэйшыя працоўныя дні.

Аднак інтарэс уяўляе і тое, на каго ў Беларусі вырашылі абаперціся літоўцы.

Рукамі Чыжа?

Паводле інфармацыі «Нашай Нівы», працы на аб’екце вядзе ЗААТ «Магнус груп». Гэтая кампанія створаная на базе літоўскіх будаўнічых арганізацый і філіі «Будаўнічае ўпраўленне» ААТ «Трайпл» Юрыя Чыжа.

Аб’екты, на якіх працаваў «Магнус груп» кажуць самі за сябе — два гіпермаркеты «Прастор», рэстаран «Ракаўскі бровар», гарналыжны комплекс «Лагойск»… Усё гэта ўласнасць Юрыя Чыжа. Што да праектаваных будынкаў, то ў спісе дасягненняў кампаніі гандлёва-забаўляльны комплекс каля «Мінск-Арэны» (таксама трайплаўскі), стадыён БАТЭ ў Барысаве, а таксама якраз гандлёвы будынак «Каменная Горка» на 80 тысяч квадратных метраў. Рэндар, прыведзены на карце, адносіцца менавіта да той часткі раёна, на якім пачаліся працы.

• 0
• 0
• 0
• 0
• 0
• 0
• 0
• 0