Норма радыяцыі ў іх была перавышаная больш чым удвая.
Небясьпечны груз быў знойдзены ў аўторак увечары на КПП пры праверцы грузавога аўтамабіля з прычэпам, за рулём якога знаходзіўся 55-гадовы грамадзянін Беларусі. Пры ўезьдзе грузавіка на КПП спрацавала стацыянарнае абсталяваньне вымярэньня радыяцыі.
Памежнікі праверылі грузавік дадаткова ручнымі прыборамі вымярэньня радыяцыі, высьветлілася, што радыяцыйны фон лісічак дасягаў каля 50 мікрарэнтген у гадзіну пры дапушчальным фоне 20 мікрарэнтген.Замер быў выраблены звонку прычэпа, магчыма, фон усярэдзіне быў бы яшчэ вышэйшы.
Паводле дакумэнтаў, груз накіроўваўся з аднаго беларускага прадпрыемства празь Літву ў краіны Заходняй Эўропы. У адпаведнасьці з устаноўленым парадкам быў апавешчаны Цэнтар радыяцыйнай бясьпекі Літвы.
Памежнікі вырашылі не пускаць груз зь Беларусі.У цэлым сёлета літоўскія памежнікі выявілі 72 выпадкі перавышэньня радыяцыйнага фону, паведамляе DELFI.
Некалькі гадоў таму Інстытут навакольнага асяродзьдзя ў Мюнхэне распаўсюдзіў заяву адносна чарговай партыі радыяактыўных лісічак, якія трапілі ў гандаль нямецкай фэдэральнай зямлі Баварыя і, мяркуючы па ўсім, таксама прадаваліся ў самых розных краінах ЭЗ. Згодна з дазымэтрычнымі вымярэньнямі, што праводзіліся супрацоўнікамі інстытуту, у кожным кіляграме гэтых імпартаваных грыбоў утрымлівалася 1000 бэкерэляў цэзію-137, што амаль удвая перавышала дапушчальную норму.
Як сьцьвярджала навуковая супрацоўніца мюнхэнскага інстытуту, фізык Карын Вурцбахер, «апошнім часам пры праверцы ўсходнеэўрапейскіх грыбоў павелічэньне цэзію проста кідаецца ў вочы.
Відавочна, што гэтыя грыбы паходзяць з пацярпелых ад чарнобыльскай радыяцыі рэгіёнаў Беларусі, Расеі і Ўкраіны, хоць у якасьці пастаўшчыка можа значыцца Літва ці іншыя не забруджаныя радыяцыяй ўсходнія краіны ЭЗ.Нярэдка гандляры ідуць і на іншыя трукі. Яны, напрыклад, зьмешваюць лісічкі, сабраныя на моцна забруджаных тэрыторыях з такімі ж грыбамі, але зь нізказабруджаных раёнаў».
Каментары