Артур Фінькевіч: «Ніхто вызваляць мяне ня будзе»
Сёньня па абедзе на працу да Артура Фінькевіча ў дзіцячы садок прыйшлі двое людзей у цывільным.
Яны сказалі, каб Артур вярнуўся зь імі ў камэндатуру, ды зазначылі жартам, што гэта зьвязана з самітам «вялікай восемкі» ў Нямеччыне. Як менавіта зьвязана, не патлумачылі.
У камэндатуры Фінькевічу сказалі, што да яго прыехаў у госьці нехта зь Менску. Артура папярэдзілі, каб ён паводзіў сябе ціха, а ня так, як 16 траўня, калі да палітвязьня прыяжджалі паслы Вялікабрытаніі і Славаччыны. Цяпер Артур знаходзіцца ў сваім пакоі ў камэндатуры.
Фінькевіч ня зьвязвае сёньняшняе здарэньне з тым, што яго могуць датэрмінова вызваліць. «Ніхто вызваляць мяне ня будзе. Толькі пару дзён таму я падпісаў дакумэнт, дзе гаварылася, што на ўмоўна‑датэрміновае вызваленьне я разьлічваць не магу, як злосны парушальнік».
Каментары