Паштовая скрынка
Міхасю Б. з Магілёва. Пачатак – як у добрага эсэ. Вельмі ж гісторыі і пэрсанажы наскія. А далей ужо ідзе не эсэ, а прамова, да таго ж вузкаспэцыялізаваная. Вось каб жа Вы гэты сардэчны пачатак узялі ды разьвілі ў эсэ.
Вячаславу М. зь Менску. Ваша рэцэнзія напісаная як выдатнае вучнёўскае сачыненьне. Уявіце, што ў каледжы Ваш настаўнік быў бы ў захапленьні. Але для газэтнай крытыкі тут мала жару і праблемнасьці, затое празь меру ацэнак.
Канстанціну К. з Магілёва. Калі вернецеся са Здалбунава, абавязкова напішэце нам пра гэты горад, пра цяпершчыну Валыні, пра свае пошукі і пра магілу Кандрата Лейкі, калі Вы яе здолееце адшукаць. Адрас Мікалая Сідарэвіча і музэю "Літаратурная Слонімшчына": Слонім 231800 вул. 1-й Семігодкі 8/7. Тэл. (01562) 3-12-78.
Андрэю З. зь Менску. "НН" ня можа аддаваць перавагу якой-кольвек адной канфэсіі, бо рэдакцыя, як і ўсё беларускае грамадзтва, шматканфэсійная. Не зьяўляемся мы і спэцыялізаваным тэалягічным выданьнем. Таму ў нашых публікацыях царква разглядаецца найперш як асяродак культуры – наколькі ён традыцыйны беларускі, незалежна ад канфэсіі. Таксама пішам мы пра перасьлед уладаў у дачыненьні да рэлігійных дзеячоў, бо асьвятляць такія выпадкі – наш маральны абавязак. Даваць тэалягічныя ацэнкі той ці іншай рэлігійнай ініцыятыве – ня маем ані мэты, ані права.
Каментары