Беларусь рухаецца да беднасьці
Інтэрвію зь міністрам замежных справаў Швэцыі Аннай Лінд
з нагоды працэсу “Пагоні”
— Спадарыня Лінд, якое Вашае меркаваньне пра беларускі рэжым сёньня?
А.Л.: Рэжым Лукашэнкі — выразна рэпрэсіўны рэжым, які ў эканамічным сэнсе адкідае краіну назад. Беларусь магла б быць сёньня багатай, дэмакратычнай і моцнай краінай — такой, як Эстонія, Латвія ці Літва. Аднак, на жаль, Беларусь рухаецца ў адваротным кірунку.
— Якая Вашая думка пра сытуацыю ў сфэры СМІ?
А.Л.: На жаль, адносіны беларускіх ўладаў зь незалежнымі журналістамі й незалежнымі СМІ пагаршаюцца. Назіраюцца й спробы выціснуць недзяржаўныя ды замежныя арганізацыі зь Беларусі. Улады ўсьведамляюць: насельніцтва можа пачаць урэшце пратэставаць супраць сытуацыі ў краіне. Таму й хочуць, каб распаўсюджвалася як мага менш інфармацыі.
— Якую пазыцыю займае Швэцыя адносна сытуацыі з СМІ ў Беларусі?
А.Л.: У нас няма прамых палітычных кантактаў зь беларускімі ўладамі — з прычыны сытуацыі ў краіне. Мы пратэстуем — як самі, так і праз Эўразьвяз.
— У выпадку з газэтай “Пагоня” Швэцыя выкажа якую-небудзь пазыцыю?
А.Л.: Так. Я чакаю, што мы зробім гэта і самі, і праз Эўрапейскі Зьвяз. На жаль, давядзецца паўтарыць тое, што мы шмат разоў гаварылі раней беларускім уладам, і зь вельмі маленькім вынікам. Мы спадзяёмся, што Беларусь забясьпечыць свабоду прэсы і будзе паважаць правы чалавека. Пасьля гэтага вашыя ўлады змогуць супрацоўнічаць з краінамі Эўразьвязу. У адваротным выпадку Беларусь застанецца ў ізаляцыі.
— Спадарыня Лінд, што Вы думаеце пра будучыню Аляксандра Лукашэнкі?
А.Л.: Са шкадаваньнем павінна адзначыць, што ён займае сёньня моцную пазыцыю. Гэта вельмі ўскладняе сытуацыю ў Беларусі. Але я веру, што людзі хутка ўсьвядомяць: Лукашэнка — ня іхная будучыня. Ён толькі ізалюе краіну й не дае ёй магчымасьці разьвівацца. З гэтае прычыны ён будзе вымушаны сысьці, нават калі ягоная ўлада сёньня здаецца даволі моцнай. Няма пэрспэктывы ў тых, хто грунтуе сваю ўладу на гвалце й рэпрэсіях, судах над палітыкамі й журналістамі. Улада ж павінна будавацца толькі на аснове сапраўднай дэмакратыі.
Паводле www.vitryssland.nu
Каментары