Дзікабраз — не вожык, і сустрэць такую жывёлу ў беларускай вёсцы практычна немагчыма.
У вёсцы Зябраўка Гомельскага раёна з’явіўся экзатычны звер — па населеным пункце ўжо два тыдні блукае дзікабраз, піша Fishing.by.
Пра дадзены факт паведаміў мясцовы жыхар Дзмітрый Астапенка, які сутыкнуўся з дзікабразам на двары ўласнага дома і шчыра здзівіўся такой нечаканай сустрэчы. Што цалкам натуральна: дзікабраз — не вожык, і сустрэць такую жывёлу ў беларускай вёсцы практычна немагчыма.
«Значна быў збянтэжаны такой сустрэчай, яшчэ і на мяне кідацца стаў. Цяпер дзесьці ў кустах сядзіць, не хачу пужаць пакуль, але не маленькі ж, знайсці можна. Прыходзіць па начах», — распавёў вясковец.
Па словах Дзмітрыя, у яго была здагадка, што гэта адзін з двух дзікабразаў, што ўцяклі летам з тэрыторыі аграсядзібы «Конны востраў» у вёсцы Гранаўка, пра што паведамлялі мясцовыя СМІ. Уладальнікам аграсядзібы патэлефанавалі, але тыя адмовіліся забіраць жывёлу, сказаўшы: «Не трэба нам».
Ад вёскі Зябраўка да Гранаўкі больш за 40 км, і на дадзены момант невядома, ці гэта той самы звер.
Цяпер жыхары вёскі занепакоеныя далейшым лёсам незвычайнага госця. Людзі гатовы дапамагчы з яго адловам і спадзяюцца, што дзікабраза да наступлення халадоў удасца прыстроіць у бяспечнае для яго месца.
Цяпер чытаюць
Коўл Лукашэнку: Табе трэба быць больш асцярожным, за сталом кепскіх пацаноў застаўся адзін ты27
Каментары