Fatalna niaśpieły elektarat
13 hadoŭ tamu adbyłasia pieršaja inaŭhuracyja pieršaha prezydenta Biełarusi. Ci była ŭ 94-m fatalnaj paraza nacdemaŭ? Ci byŭ šaniec?.. Piša ŭ svaim błohu Alaksandar Kłaskoŭski.
13 hadoŭ tamu adbyłasia pieršaja inaŭhuracyja pieršaha prezydenta Biełarusi. Potym cyrymonii paŭtoracca ŭ 2001-m i 2006-m. Budzie mianiacca anturaž, ale nie fihura tryjumfatara.
Jon sapraŭdy tryjumfalna pieramoh Kiebiča, paabiacaŭšy źvieści pad korań karupcyju staroj namenklatury. Za 13 hadoŭ paŭsiudna i šmatkroć pieratresienyja kadry. Ale, jak vynikaje z vystupu Łukašenki na ŭčorašniaj naradzie ŭ KHB, karupcyja kvitnieje i ŭ viedamstvie žaleznaha Feliksa! Pryčym navat "u milicyi ŭ nas hety praces u mienšaj stupieni raźvivajecca, čym u KHB". Vo jaki paraŭnalny analiz davodzicca rabić paśla 13 hadoŭ biaźlitasnaha zmahańnia z toj hidraj!
Choć u blin raźbisia, a karupcyja ŭsio adno budzie kvitnieć tam, dzie niama prazrystaści ŭłady, narmalovych rynkavych praviłaŭ. Biełaruski paradoks: rynku niama, a biznes jość. Sakret prosty: jon vyžyvaje praz "kryšavańnie" (tak nichto i nie prapanavaŭ adekvatny pierakład hetaj słenhavaj pačvary:)
Zhadka ž pra elektaralny siužet 1994 hodu znoŭ prymušaje zadać balučaje pytańnie: ci była fatalnaj paraza nacdemaŭ? Ci byŭ by šaniec, kab niejkim cudam parazumielisia tady Paźniak z Šuškievičam?
Uvohule ž varta pryznać: demakraty pačatku 90-ch byli dyletantami ŭ palitycy (adčuvaju, jak zaraz uzdymiecca na dybki chto-kolviek sa starych zmaharoŭ!:) Ich elektaralnyja kampanii ŭletku 1994-ha ładzilisia davoli niaŭkludna, biez naležnaha ŭliku palittechnalohijaŭ. Ja ŭžo zhadvaŭ, jak daviałosia dyskutavać tady z pradstaŭnikami kamandy Šuškieviča, davodziačy, što jahonuju pieradvybarčuju prahramu varta padavać bolej papularna, bo napisanyja prafesuraj makraekanamičnyja tezy narod nie prahłynie.
Kaniešnie, navat samy ŭdały styl prahramy nie zrabiŭ by cudu. Prablema była ŭ mentalnym stanie elektaratu. Jon akazaŭsia nie saśpiełym dla vytančanych prajektaŭ. Jon prahnuŭ viartańnia ŭ śvietłuju minuŭščynu, pryčym nie časoŭ VKŁ, a saŭkovaha peryjadu. U sytuacyi biazładździa paśla razvału sacyjalistyčnaj imperyi narod pavioŭsia na papulisckuju prynadu.
Aŭtar kamentaru ŭ "Salidarnaści" słušna zaznačaje, što siahońniašniaja sytuacyja vyhladaje nadta padobnaj. Biełaruski rymejk savieckaj systemy zaraz moža raspaŭźcisia pa švoch, a miž tym nazirajecca "taja ž amorfnaść elitaŭ dy hramadztva. Znoŭ ža adsutnaść jakojści vyraznaj alternatyŭnaj prahramy dziejańniaŭ".
Sapraŭdy, iluzija lohkich rašeńniaŭ moža być niebiaśpiečnaj. Niekali padčas pierabudovy demakratam zdavałasia: aby tolki skasavać 6-y artykuł pra kiroŭnuju rolu KPSS — i nastanie ziamny raj. U 1994-m mnohija hałasavali suprać zastojnaj ułady Kiebiča, a chto-kolviek razhladaŭ kandydata Łukašenku jak terminatara, čyja misija — adno što prakłaści šlach da ŭłady maładym prahresiŭnym intelektuałam… Siońnia mnohim zdajecca, što skančeńnie ŭ toj ci inšaj formie ery pieršaha prezydenta aŭtamatyčna vyrašyć prablemu histaryčnaha vybaru i ŭpeŭnienaha raźvićcia Biełarusi. Ale heta znoŭ moža stacca horkaj iluzijaj. Praź niejki čas my znoŭku ŭpremsia ŭ toje, što vialikija navukoŭcy nazyvajuć punktam bifurkacyi:) I lepiej ŭžo siońnia hladzieć dalej nosa.
ZY. Pry ŭsim pry tym nielha kazać adno što pra "vyrvanyja hady". Za hetyja 13 hadoŭ u biełaruskim socyjumie adbylisia cikavyja zruchi. Važna ich asensavać i zrabić pravilnyja vysnovy. U pryvatnaści palittechnalahičnaha kštałtu. Zrešty, heta asobnaja tema.
«Zasiarodžusia na pracy z ZŠA». Cichanoŭski raskazaŭ pra svaje palityčnyja płany na 2026 hod32
Kamientary