U čaćvier budzie prysud pa spravie ab «ekstremisckich fotach»

Siońnia Ašmianski rajonny sud raspačaŭ razhlad alboma «Pres-fota Biełarusi — 2011» na pradmiet ekstremizmu. Pasiadžeńnie pačałosia, a 11-j hadzinie i prachodzić u zakrytym režymie. Razhlad spravy inicyjavała ŭpraŭleńnie KDB pa Hrodzienskaj vobłaści.

41 asobnik alboma «Pres-fota Biełarusi — 2011» byŭ kanfiskavany ŭ fatohrafaŭ Julii Daraškievič i Alaksandra Vasiukoviča 2 listapada 2012 hoda na pamiežnym pierachodzie «Kamienny Łoh».

U jakaści «zacikaŭlenych asob» pa spravie ab pryznańni alboma «Pres-fota Biełarusi — 2011» ekstremisckim prachodziać fatohrafy Julija Daraškievič, Alaksandr Vasiukovič i Vadzim Zamiroŭski, jaki razam z Daraškievič źjaŭlajecca arhanizataram konkursu «Pres-fota Biełarusi».

U sud pryjechali Julija Daraškievič, Alaksandr Vasiukovič i Vadzim Zamiroŭski (na fota).

Taksama kala budynka suda sabralisia 15 žurnalistaŭ, u tym liku zdymačnaja hrupa NTV, eks-viazień-žurnalist, što prachodziŭ pa spravie ab paklopie na Łukašenku, Andrej Pačobut, a taksama pravaabaroncy Andrej Bastuniec i Hary Pahaniajła, nikoha z palitykaŭ u Ašmianach niama, udakładniaje Jeŭraradyjo.

Pierad pačatkam suda nadarvany ściah na rajvykankamie zamianili na novy, paviedamlaje Biełsat.

Advakatka Łarysa Atamančuk skazała, što padaść chadajnictva, kab u sud vyklikali usich siabroŭ žury fotakonkursu. Taksama jana budzie prasić, kab pradstaŭnik «Belarus Press Photo» prysutničaŭ pry źniščeńni fotaalbomaŭ, kali takoje rašeńnie budzie pryniataje, paviedamlaje Radyjo Svaboda.

11:10

U zału suda prapuścili Andreja Bastunca i Hary Pahaniajłu, žurnalistam prysutničać nie dazvolili.

11:53

Advakat padała chadajnictva ab prypynieńni spravy. Abvieščany pierapynak da 14:00.

Pravaabaroncaŭ, darečy, adchilili ad udziełu u pracesie.

14:10

Chadajnictvy ab skasavańni zabarony na viadzieńnie fota i videazdymki adchilili.

Adchilena chadajnictva ab prypynieńni spravy.

Sud praciahvajecca. Začytvajuć zvarot načalnika KDB pa Hrodzienskaj vobłaści I. Karža. Ad jaho imia vystupaje juryskonsult abłasnoha KDB Natalla Skurat

14:21

Pradstaŭnik zajaŭnika sprabuje davieści abhruntavanaść zajavy, čytaje z papierak, zapinajecca.

Pytańnie pra ekśpiertnuju acenku: jakija pytańni stavilisia pierad kamisijaj, jak farmiravaŭsia jaje skład?

Advakat, jaki pradstaŭlaje žurnalistaŭ, pytajecca, čamu było vyrašana, što abłvykankam kampietentny farmiravać kamisiju?

Adkaz: «Tam ža nie tolki pradstaŭniki ideałahičnaha adździeła abłvykankama».

14:27

Advakat žurnalistaŭ pytajecca ŭ juryskonsulta KDB: Jakija materyjały alboma zaklikajuć da ekstremisckaj dziejnaści? Dzie tam zakliki da ekstremizmu?

Adkaz: padborka materyjałaŭ skažona adlustroŭvaje žyćciadziejnaść Respubliki Biełaruś. Zatym Natalla Skurat zamaŭkaje, nie moža adkazać na pytańnie.

Vystupaje žurnalistka Julija Daraškievič. Jana raskazvaje pra toje, što ŭ albomie sabranyja fota pieramožcaŭ konkursu, u tym liku fatohrafaŭ dziaržaŭnych ŚMI, fatahrafii aceńvała mižnarodnaje žury.

Julija Daraškievič: Fotazdymki nie padbiralisia ni aŭtarami, ni redaktarami, ni vydaŭcami. U knizie apublikavanyja tolki vyniki konkursu — jaho pieramožcy.

Sudździa pytajecca: Ź jakoj metaj vieźli knihi (skanfiskavanyja zatym na pamiežnym pierachodzie)?

Ju. Daraškievič: Daryć, dla kaleh, dla vystavaŭ, biblijatek.

Zaraz vystupaje fatohraf Vadzim Zamiroŭski — taksama adzin z arhanizataraŭ konkursu.

V.Zamiroŭski zaznačaje: «Chaču padkreślić, što materyjały alboma — nie našyja vydumki, a vynik pracy mižnarodnaha žury — bolš kvalifikavanaha, čym ekśpiertnaja kamisija, jakaja aceńvała albom.

Chaču adznačyć, što aŭtaram fota, pavodle ŭmovaŭ konkursu, zabaraniałasia ŭmiešvacca ŭ padziei, rabić pastanovačnyja zdymki»

Zdymki, jakija ŭvajšli ŭ albom, raniej byli apublikavanyja ŭ ŚMI i na stužkach mižnarodnych ahienctvaŭ».

Vystupaje Alaksandr Vasiukovič. Jon paŭtaraje faktyčna skazanaje Daraškieviča i Zamiroŭskim. Pra toje, što vybirajucca lepšyja zdymki mižnarodnym žury, jakomu niama sensu pakazvać Biełaruś u niehatyŭnym śviatle.

Sudździa pytajecca pra zdymki Vasiukoviča, šukaje ich u albomie.

14:47

Začytvajuć daviedku eskpiertnaj kamisii (vyniki eskpiertyzy), potym budzie vystupać načalnik upraŭleńnia ideałahičnaj raboty Hrodzienskaha abłvykankama Pavieł Skrabko.

15:01

Pradstaŭnik žurnalistaŭ prosić pradstaŭnicu KDB Natallu Skurat abrhuntavać kampietentnaść kamisii.

Taja adkazvaje, što kamisiju farmiravała nie KDB, a Hrodzienski abłvykankam.

15:02

Vystupaje načalnik upraŭleńnia ideałahičnaj raboty Hrodzienskaha abłvykankama Pavieł Skrabko. Koratka paviedamlaje źviestki pra siabie.

Raspaviadaje, jak stvarałasia kamisija: «U jaje skład uvajšli mastactvaznaŭcy, psichołahi i jurysty dla bolšaj abjektyŭnaści».

Pradstaŭnik žurnalistaŭ pytajecca: Jakija pytańni byli pastaŭlenyja pierad kamisijaj?

Skrabko: Ci jość u albomie prykmiety ekstremisckaj dziejnaści.

Pradstaŭnik žurnalistaŭ pytajecca: Ci paviedamlali ekśpiertam pra ich pravy i abaviazki?

Skrabko kaža, što nie: «Tam byli jurysty, jany i tak viedali».

15:15

Pradstaŭnik advakataŭ pytajecca pra asobnyja farmuliroŭki: čamu vy zrabili vysnovu, što pradstaŭnikam milicyi prypisvajucca nizkija maralnyja jakaści?

Čamu vy zrabili vystnovu, što hetyja fotazdyki padryvajuć aŭtarytet Biełarusi? Vy pravodzili sacyjałahičnyja daśledavańni?

Adkaz: nie

Pačałasia sapraŭdnaja burnaja dyskucija, sudździa prosić jaje prypynić.

15:23

Pradstaŭnica žurnalistaŭ: Vy zaŭvažyli prykmiety fotamantažu na zdymkach?

Adkaz: Nie, my nie možam heta vyznačyć, u nas nie było sychodnych materyjałaŭ.

A kali b byli?

Moža mastactvaznaŭca i moh by, ale tut patrebny inšyja śpiecyjalisty.

Pradstaŭnica žurnalistaŭ: Čamu vy kažacie pra abrazu hramadzian RB? Da vas źviartalisia hramadzianie ci heta tolki vašaja vysnova?

Skrabko: Naša vysnova. Ale ž była ekśpiertyza, hety albom moža abrazić i inšych hramadzian.

15.35

Pytańnie pra fota z mužčynami, jaki prymiarajuć kapielušy. Čamu vy ličycie, što hetyja ludzi pradstaŭlajuć uvieś biełaruski narod? Čamu vy robicie vysnovu, što na fonie mienavita novyja i zachodnija rečy?

Pytańnie: na jakoj movie zrobleny podpisy da fota?

Skrabko: Na biełaruskaj.

Pytańnie: Čamu ŭ hetym razie vy karystalisia słoŭnikami Ušakova i inš., a nie słoŭnikami biełaruskaj movy?

Ckrabko: U podpisach słovy, jakija majuć adnolkavaje značeńnie ŭ rasijskaj i biełaruskaj movach.

Pytańnie: Što takoje «nizki estetyčny rakurs»?

Adkaz: A pa-vašamu jon vysoki?

Čamu vy zrabili takuju vysnovu?

Na padstavie fota.

Pradstaŭnica žurnalistaŭ: Čamu vy ličycie temy Čarnobyla «niepryhladnaj»?

Skrabko: Niepryhladnaja padborka fota.

Pradstaŭnica žurnalistaŭ: Čamu vy nie pišacie mienavita tak u ekśpiertyzie, a nazyvajecie niepryhladnymi temy? Aśviatleńnie hetych tem — ekstremizm?

Ciapier razhladajuć inšyja materyjały spravy.

15:51

Pradstaŭnik žurnalistaŭ prosić vyklikać inšych ekśpiertaŭ, abaviazać ekśpiertaŭ, jakija buduć prychodzić na sud, prynieści dakumienty, jakija śviedčyli b pra ich adukacyju i kampietentnaść.

Pradstaŭnica KDB: Heta niemetazhodna, KDB moh by i sam zrabić vysnovu ab ekstremiźmie, ale sabraŭ kamisiju.

Pradstaŭnica žurnalistaŭ prosić dałučyć da spravy zvarot da suda ad pradstaŭnikoŭ tvorčaj intelihiencyi, u jakim havorycca pra vysoki ŭzrovień «BiełPresFota» i jaho važnaść.

16:08

Pradstaŭniki žurnalistaŭ prosiać dałučyć da spravy zajavu Hary Pahaniajła pra vysoki ŭzrovień i praŭdzivaść fotazdymkaŭ z alboma, sudździa admoviŭ.

Sudździa niekalki razoŭ nazvaŭ BCHK «Biełaruskim sielskim kamitetam».

U sudzie abvieščany pierapynak na 10 chvilin, potym adbuducca sudovyja sprečki.

16:21

Sud adnaviŭ pracu.

Žurnalisty, ich pradstaŭniki i pradstaŭnica KDB ahučvajuć svaje pazicyii — faktyčna paŭtarajuć skazanaje raniej.

16:27

Pradstaŭnik žurnalistaŭ: u albomie tolki kala 30 zdymkaŭ, u jakich pavodle mierkavańnia kamisii možna znajści prykmiety ekstremizmu, astatniaje — fota biełaruskaj pryrody, kultury.

16:33

Na siońnia praces zavieršany. Rašeńnie suda budzie ahučana zaŭtra, 18 krasavika, a 16-j hadzinie.

* * *

«Uvieś biełaruski narod u bamžavatym vyhladzie» — tekst ekśpiertyzy ekstremisckich zdymkaŭ «Pres-fota Biełarusi»

• 0
• 0
• 0
• 0
• 0
• 0
• 0
• 0