Spadar prezident, napisanamu mnoju
Listu, kab dajści da vas akurat,
Musić, vierahodna, paščaścić bolej, čym Noju,
Kab dasiahnuć svajoj hary Ararat.
Tym nie mieniej, spadziajusia, što moj list u butelcy,
Pierastaŭšy być listom u majoj hałavie,
Budučy «kinutym u vadu», jak i ŭsie tapielcy?
Niejak i niedzie adnojčy ŭsio ž uspłyvie.
Pačnu z padziakaŭ. Bo žanr ich vymahaje.
Adrazu — dziakuj za ŭvahu, naturalna ž. Kali
Ź pieršaj usio zrazumieła, tady druhaja.
Bolš składanaja. Dziakuj za toje, što vy zmahli
Skarystacca ŭładaj, što vam, biezumoŭna, narod daŭ
Dla taho kab ( choć i nie kančatkova) pravieści miažu,
Pamiž ludźmi i ŭrodami. I ŭrodaŭ
Abaznačyli prykmietami, zhodna ich typažu.
Heta varta padziakaŭ. Ale ŭ spakoi
Vas pakidaju z padziakami, nie skvapnaha na miedali,
Adnym urodam vy vydali formu, jakoj i
U sensie hieamietryčnym formu im prydali.
Inšym urodam, jakija źjaŭlajucca kłasam, ci jak tam? —
Z toj ahavorkaj, što ŭ cełym ich dosyć nia šmat —
Mocna ruku paciskajučy, hetym ža aktam
Čornuju mietku im addajecie jak styhmat.
Spadar prezident, hetaja misija sapraŭdy vartaja muža.
Razabraŭšysia z ustupam —— da spravy. Pa spravie —— tak… para słoŭ.
Jość takaja štuka, ciapier papularnaja duža.
Piramidka. Nazyvajeccca piramidaj patrebaŭ Masłoŭ.
Tam usio prosta. U piramidalnaj bazie
Patreba ŭ ježy, vyšej —— u biaśpiecy, paśla
Luboŭ, pavaha, viedy i dalej. Va ŭsialakim razie
Piramida nie isnuje, budučy nižej za płanku nula.
Moj dzied pamior nie tak daŭno. Pryblizna, kali vy
U čaćvierty raz abviaścili svoj «pieršy» pad zorkaju Iljiča.
I voś viedajecie, ja dumaju, što daravać niemažliva?
Što jon tak i nie ŭbačyŭ nikoha. Kaniešnie ž, Vas aprača.
Jak i ŭsie chto ŭ dziacinstvie pabačyŭ ruiny,
Moj dzied nienavidzieŭ Stalina. Pieražyŭšy vajnu,
U staraści, jon žyŭ u čakańni novaj krainy,
i tamu nienavidzieŭ Vas. Što ž. Ci heta pastaviš u vinu?
Ci spraviadlivy taki abmien jahonaha času? Mažliva Fiemida
Nam dała novy sens u pramacvańni zybkaha dna.
Sprava ŭ tym, što pad korań usiečanaja piramida —
Nie piramida i nad pavierchniaju nie vidna.
Ale drevy rastuć. Drevy rastuć…
…Podpis, data.
Moj postskryptum. Nie dla žanočych vušej.
Reziumirujecca ŭsio skazanaje dobra, ja b skazaŭ p….ta
Tym, što navat Chieops budavaŭ piramidy vyšej.
Ciapier čytajuć
Zahinuŭ biełaruski dobraachvotnik Alaksiej Łazaraŭ10
Kamientary