23 žniŭnia
Tacianie Sieviaryniec nie dazvolili pracavać
Viciebskaja abłasnaja sudovaja kalehija admoviła Tacianie Sieviaryniec va ŭznaŭleńni na pracy, paćvierdziŭšy rašeńnie Pieršamajskaha rajonnaha sudu pra zakonnaść jejnaha zvalnieńnia. Spn.Sieviaryniec ličyć vyrak palityčna matyvavanym. Maci Paŭła Sieviarynca zvolnili ź siaredniaj škoły №40 nibyta za prahuły.
Akcyja suprać zatrymańniaŭ prajšła biez zatrymańniaŭ
Akcyja pratestu suprać pazapraŭnych zatrymańniaŭ i źbićcia maładych aktyvistaŭ apazycyi prajšła na skryžavańni vulicaŭ Niamiha i Haradzki Vał. Dvaccać čałaviek razharnuli raściažku «Pakul ty siadziš doma, jany źbivajuć dziaŭčynak» i plakaty, na jakich była infarmacyja ab padziejach 16 žniŭnia. Akcyja doŭžyłasia 15 chvilinaŭ i skončyłasia biez zatrymańniaŭ.
Nie zarehistravali «Viasnu»
Ministerstva justycyi admoviła ŭ rehistracyi hramadzkamu pravaabarončamu abjadnańniu «Viasna». Arhanizacyju nie zarehistravali, bo 20 z 69 zasnavalnikaŭ mieli administracyjnyja pakarańni, a niekatoryja ź ich navat piać razoŭ. Taksama niezadavolenaść u Minjuście vyklikaŭ statut «Viasny», bo «źmiaščaje nie kankretnyja mety i praduhledžvaje mahčymaść dadzienaha abjadnańnia dziejničać u dasiahnieńni inšych, nie ŭkazanych u statucie, metaŭ». Prykładna pa toj samaj pryčynie miesiac tamu było admoŭlena ŭ rehistracyi i mienskaj haradzkoj arhanizacyi «Maładoha frontu».
Kadebisty dapytvajuć «kalinoŭcaŭ»
20‑hadovaha pinčuka Ihara Sałaŭja milicyjanty vyklikali ŭ HUUS da majora Nikałajčanki. Pasadzili ŭ aŭtamabil, ale advieźli nie ŭ HUUS, a ŭ hatel «Prypiać». Tam troje ludziej u cyvilnym, ź jakich paśviedčańnie supracoŭnika KDB pakazaŭ tolki adzin, viali pierakryžavany dopyt chłopca. Raspytvali pra navučańnie ŭ Polščy. Pry hetym jany pahražali chłopcu vialikimi niepryjemnaściami ŭ vypadku, kali kamuści raskaža pra hetuju «hutarku».
25 žniŭnia
Padtrymali Azarku
U noč ź piatnicy na subotu ŭ Niaśvižy milicyjanty zatrymali Nastu Pałažanku, Arcioma Dubskaha i Alaksandra Žukava dla pravierki dakumentaŭ i abvinavacili ŭ naniasieńni nadpisu «Biełaruś — heta śviatoje». Maładyja ludzi pryjechali padtrymać Nastu Azarku, suprać jakoj uzbudžanaja kryminalnaja sprava za palityčnuju dziejnaść. N.Pałažanku, jak niapoŭnahadovuju, adpravili damoŭ. Astatnija noč praviali ŭ pastarunku.
26 žniŭnia
Načnoje zatrymańnie viernikaŭ u Homieli
U Homieli milicyjanty zablakavali pryvatny dom, u jakim prachodziła sustreča žycharoŭ horadu z byłym viaźniem HUŁAHu, pastaram zakrytaj uładami Biełaruskaj evanhielskaj carkvy Ernstam Sabiłam. Zatrymali dzieviacioch udzielnikaŭ sustrečy. Kiravali zatrymańniem major Uładzimier Hasimaŭ z Čyhunačnaha rajadździełu milicyi Homiela ź lejtenantam Anatolem Łojem. Abodva nia mieli orderu na pieratrus, svaje dziejańni tłumačyli tym, što šukajuć złačyncaŭ.
27 žniŭnia
Šydłoŭskaha znoŭ u turmu
Milicyja zatrymała aktyvista demakratyčnaha ruchu Alaksieja Šydłoŭskaha i paviezła ŭ turmu na Akreścina. Jon musić adsiedzieć jašče piać sutak pavodle rašeńnia sudu.
Nahadajem, što napiaredadni śviatkavańnia Dnia niezaležnaści 27 lipienia A. Šydłoŭski ciaham dnia byŭ dvojčy zatrymany. Dvojčy na jaho składali pratakoły. Pavodle druhoha byŭ vyniesieny prysud — 15 sutak. Hety termin źniavoleńnia apazycyjaner adbyŭ. Ciapier Alaksiej Šydłoŭski pavinien adsie¬dzieć 5 sutak — prysud pavodle pieršaha pratakołu. U abodvuch vypadkach jon abvinavačvaŭsia ŭ drobnym chulihanstvie.
Ministerstva justycyi vybačyłasia
Ofis BSDP (H) naviedała pradstaŭnica Ministerstva justycyi.
Jana paprasiła viarnuć list Ministerstva ad 22 žniŭnia «Ab vyniasieńni piśmovaha papiaredžańnia BSDP (H)». Pry hetym supracoŭnica Minjustu patłumačyła, što list byŭ nakiravany pamyłkova — nasamreč papiaredzili sacyjał‑demakrata Stanisłava Šuškieviča.
Pisać «Biełaruś — heta śviatoje» — nie złačynstva
Sudździa Niaśviskaha rajonnaha sudu Dźmitry Hvozd spyniŭ spravavodztva pavodle administracyjnaj spravy Nasty Azarki, Alesia Žukava i Arcioma Dubskaha. Sud nie znajšoŭ u materyjałach spravy dokazaŭ viny.
Kamientary