Navukoŭcy: Čym bolš karystajeciesia Fejsbukam, tym mienš vy zadavolenyja svaim žyćciom
Da takoj vysnovy pryjšli dva navukoŭcy, adzin ź Mičyhanskaha ŭniversytetu ŭ ZŠA, a druhi ź Luvenskaha ŭniversytetu ŭ Belhii, jakija niadaŭna apublikavali vyniki svajho supolnaha dośledu ŭ časopisie Public Library of Science.
U dośledzie ŭdzielničali 82 karystalniki Fejsbuku va ŭzroście pryblizna 20 hadoŭ. Jany dobraachvotna pahadzilisia na praciahu dvuch tydniaŭ pa piać razoŭ na dzień davać spravazdačy pra svajo samaadčuvańnie i svajo naŭprostavyja sacyjalnyja kantakty ciaham dnia (telefonnyja razmovy i sustrečy ź inšymi ludźmi). Dziela hetaj mety daśledniki piać razoŭ na dzień, pamiž 10-j hadzinaj ranicy i poŭnačču, pasyłali hetym dobraachvotnikam admysłovyja karotkija apytalniki, jakija im treba było zapoŭnić.
Paśla analizu atrymanych adkazaŭ daśledniki dajšli da vysnovy, što čym bolš čałaviek karystaŭsia Fejsbukam pamiž zapaŭnieńniem dvuch čarhovych apytalnikaŭ, tym horšaje było ŭ jaho samaadčuvańnie pry zapaŭnieńni druhoha apytalnika ŭ paraŭnańni sa spravazdačaj u papiarednim.
Dałasia zaŭvažyć i vyraznaja suviaź pamiž samaadčuvańniem i kantaktami dobraachvotnikaŭ u realnym śviecie: čym bolš u čałavieka było kantaktaŭ u realnym śviecie (telefonnych razmovaŭ i sustrečaŭ), tym bolš stanoŭča jany pisali pra svajo samaadčuvańnie ŭ apytalnikach.
Daśledniki adznačajuć, što ni poł dobraachvotnikaŭ, ni pamier ich sacyjalnych kantaktaŭ, ni zajaŭlenaja matyvacyja dziela karystańnia Fejsbukam, ni asabisty ŭzrovień samoty abo depresii nia mieli ŭpłyvu na vyniki dośledu. Tamu jany zaklučyli, što Fejsbuk, zamiest taho, kab pavialičvać dobraje samaadčuvańnie čałavieka, chutčej padryvaje jaho.
Zhadany dośled, jak adznačaje Economist, nie sprabuje rastłumačyć, čamu znosiny ŭ Fejsbuku tak mocna adroźnivajucca svaimi nastupstvami ad znosinaŭ u realnym śviecie. Ale hetuju roźnicu, mahčyma, tłumačyć raniejšy dośled dvuch niamieckich sacyjolahaŭ, adnaho z Darmštackaha ŭniversytetu, a druhoha z Berlinskaha ŭniversytetu imia Humbalta. Niamieckija navukoŭcy, jakija svaim dośledam achapili 584 karystalnikaŭ Fejsbuku va ŭzroście pryblizna 20 hadoŭ, pryjšli da vysnovy, što samym častym pačućciom, jakoje ŭźnikaje pry karystańni hetaj sacyjalnaj sietkaj, źjaŭlajecca zajzdraść. Biezupynnaje paraŭnoŭvańnie siabie z padpraŭlenymi fotkami i samavychvalańniem svaich adnahodkaŭ, ličać niamieckija daśledniki, vyklikaje ŭ karystalnikaŭ Fejsbuku zajzdraść i padobnyja joj emocyi, jakija nijakim čynam nie palapšajuć samaadčuvańnia.
Ciapier zastajecca vyśvietlić, jak adznačaje Economist, ci i starejšyja karystalniki Fejsbuku taksama adčuvajuć siabie bolš nieščaślivymi, padtrymlivajučy virtualnyja znosiny ŭ hetaj sacyjalnaj sietcy.
Kamientary