26 žniŭnia Minski haradski sud razhledzić skarhu rodnych Uładzisłava Kavalova
26 žniŭnia Minski haradski sud razhledzić skarhu maci i siastry Uładzisłava Kavalova, adnaho z dvuch rasstralanych pa abvinavačańni va ŭčynieńni teraktu ŭ minskim mietro, na dziejańni dziaržorhanaŭ, jakija admaŭlajucca raskryć miesca jaho pachavańnia.
Jak paviedamiła BiełaPAN maci pakaranaha Luboŭ Kavalova, pasiadžeńnie suda pavinna pačacca ŭ 10.00.
Skarhu ŭ Minharsud Luboŭ Kavalova i Taćciana Kaziar nakiravali 6 žniŭnia. Žančyny infarmujuć, što sud Kastryčnickaha rajona Minska, kudy jany źviartalisia raniej, niepravamierna admoviŭ im u raspačynańni hramadzianskaj spravy pa skarzie na dziejańni KDB, MUS i departamienta vykanańnia pakarańniaŭ MUS, jakija admaŭlajucca raskryć miesca pachavańnia Uładzisłava Kavalova. Svaje dziejańni hetyja dziaržorhany matyvujuć č. 5 art. 175 Kryminalna-vykanaŭčaha kodeksa, pavodle jakoj "cieła dla pachavańnia nie vydajecca, pra miesca pachavańnia nie paviedamlajecca".
Maci i siastra rasstralanaha arhumientujuć svaju pazicyju rašeńniem Kamiteta AAN pa pravach čałavieka, jaki pry razhladzie spravy Kavalova ŭstanaviŭ, što ŭtojvańnie miesca pachavańnia pakaranaha ŭjaŭlaje saboju parušeńnie artykuła 7 Pakta ab hramadzianskich i palityčnych pravach, jaki ŭstanaŭlivaje zabaronu katavańniaŭ i žorstkaha biesčałaviečnaha abychodžańnia.
Kamientujučy situacyju, pravaabaronca Raman Kiślak, jaki akazvaje pravavuju dapamohu rodnym Kavalova, padkreśliŭ: "U hetym vypadku maje miesca admova ŭ pravasudździ. Sud Kastryčnickaha rajona Minska ŭ svajoj pastanovie pra admovu ŭ raspačynańni spravy ŭkazaŭ, što sprava niepadviedamasnaja sudu, bo hetyja pytańni vyrašajucca ŭ inšym niesudovym paradku. Ale ŭ realnaści nijakaha inšaha paradku ci pracedury dla vyrašeńnia hetych pytańniaŭ paprostu nie isnuje".
U vyniku vybuchu na stancyi mietro "Kastryčnickaja" ŭ Minsku 11 krasavika 2011 hoda zahinuli 15 čałaviek, 315 — paciarpieli. Va ŭčynieńni teraktu byŭ abvinavačany Dźmitryj Kanavałaŭ, Uładzisłava Kavalova pryznali jaho saŭdzielnikam. Abodva byli žycharami Viciebska. 30 listapada 2011 hoda Viarchoŭny sud pryhavaryŭ maładych ludziej da vyšejšaj miery pakarańnia. Kanavałaŭ pryznaŭ svaju vinu ŭ sudzie i pa pamiłavańnie da prezidenta nie źviartaŭsia, Kavaloŭ takoje prašeńnie padaŭ. Pavodle aficyjnaj infarmacyi, abodva byli rasstralanyja ŭ siaredzinie sakavika 2012 hoda.
Kamientary