Apostalski Nuncyj sustreŭsia z ks. Łazaram u SIZA KDB i pieradaŭ jamu ružaniec ad Papy
U piatnicu 25 kastryčnika Apostalskamu Nuncyju ŭ Biełarusi arcybiskupu Kłaŭdyjo Hudžeroci dazvolili sustrecca z ksiandzom Uładzisłavam Łazaram u śledčym izalatary KDB, dzie ŭžo niekalki miesiacaŭ znachodzicca aryštavany śviatar.
Sustreča tryvała kala hadziny i adbyvałasia ŭ prysutnaści adkaznaha za śledstva i pradstaŭnika Ministerstva zamiežnych spraŭ Biełarusi, jaki vykonvaŭ abaviazki pierakładčyka.
Pradstaŭnik Papy zapeŭniŭ aryštavanaha śviatara ŭ asabistaj blizkaści Papy Franciška i ŭsiaho Katalickaha Kaścioła ŭ Biełarusi, jaki ź pilnaj uvahaj supravadžaje śviatara biezupynnaj malitvaj.
Ksiondz Uładzisłaŭ Łazar, jaki vyhladaje vyprabavanym turemnym źniavoleńniem, ale ćviarozym i rašučym, z uzrušańniem vykazaŭ padziaku Papu, taksama za ružaniec, jaki pieradaŭ Pantyfik, i skazaŭ, što aryšt, jaki časam źjaŭlajecca vialikaj pakutaj, nie pieraškodziŭ jamu žyć hłybokim duchoŭnym dośviedam.
Jon śćvierdziŭ taksama, što źjaŭlajecca patryjotam, lubić Biełaruś i čakaje spraviadlivaha rašeńnia. Jak čałaviek vierujučy, ks. Uładzisłaŭ skazaŭ, što prabačyŭ tym, chto staŭsia pryčynaj jahonych pakutaŭ.
Ksiondz Uładzisłaŭ paprasiŭ Apostalskaha Nuncyja zaachvocić usich da malitvy za jaho i zaznačyŭ, što adčuvaje blizkaść Katalickaha Kaścioła, simvalična prysutnaha ŭ hučańni kaściolnych zvanoŭ, huki jakoha dalatajuć da jahonaj kamiery.
Razmova mieła niefarmalny, braterski charaktar i skončyłasia supolnym pažadańniem, kab śledstva było zavieršana jak maha chutčej, paviedamlaje catholic.by.
Ksiandzu Uładzisłavu Łazaru stavicca ŭ vinu pieradača hrošaj i materyjalnych kaštoŭnaściaŭ čałavieku, jaki abvinavačvajecca ŭ špijanažy na karyść inšaj dziaržavy.
Jon abvinavačvajecca pavodle p. 1 art. 356 Kryminalnaha kodeksa (zdrada dziaržavie). Jaho kryminalnaja adkaznaść vyznačajecca p. 6 art. 16 KK (sadziejničańnie ŭ złačynstvie), što praduhledžvaje termin pakarańnia ad 7 da 15 hadoŭ. Ks. Łazar ŭtrymlivajecca ŭ turmie SIZA KDB u Minsku. Infarmacyju pra heta raspaŭsiudziła Kanfierencyja katalickich biskupaŭ Biełarusi, što adbyłosia 12 vieraśnia.
Ciapier čytajuć
U centry Minska tajamniča źnikła dačka dyrektara bujnoha ahrakompleksu8
Kamientary