Alona Vałyniec-Čarniajeva: Pavodziny «lažać-bajacca» Biełarusi nie ŭratujuć

Adzin apazycyjny dziajač u svaim FB niadaŭna zajaviŭ, što sotnik, jaki zaklikaŭ nie pryznavać pahadnieńnie, što padpisali niekatoryja palityčnyja lidery ź Janukovičam, dy davieści spravu adchileńnia da kanca – durań i hapon. Heta, maŭlaŭ, jon vinavaty ŭ tym, što Rasieja akupavała Krym, i Ŭkraina znachodzicca na miažy vajny. I dadaje, što žachliva, kali palitykaŭ nichto nia słuchaje, a pracesam rulić niejki tam vyskačka z natoŭpu.

Nibyta pahadnieńnie zaklučałasia, kali ŭžo nie stralali (aha, až ceły dzień), dyk i treba było im kiravacca. Dziŭna, kali čałaviek, jaki ličyć siabie biełaruskim palitykam, nia pamiataje zusim niadaŭniaj historyi svajoj krainy, i, zdajecca, zusim nia ŭ kursie, jak takaja samaja pahadnialnaja dziejnaść spryčyniłasia da taho stanu, u jakim my ciapier i žyviem. Abviaščajučy zamireńnie dziela «kampramisu», Janukovič praciahvaŭ zamianiać siłavikoŭ na bolš lajalnych. Napeŭna, prosta tak, u paradku medytacyi?

Raspuściŭšy Majdan, i apynuŭšysia pierad faktam niedatrymańnia damovaŭ, trojca Kličko-Jacaniuk-Ciahnibok užo nie zmahła b pačać usio spačatku. Nia tolki praz uzmacnieńnie represiŭnaha aparatu, ale i praz stratu ŭłasnaha aŭtarytetu.

Inakš, kažučy nijakaja damova, jakaja nie praduhledžvała straty realnaje ŭłady Janukovičam nie była b dla jaho abaviazkovaj faktyčna.

U Rasiei ideja pra toje, što, kali Ŭkraina choča na Zachad, to chaj idzie biez «Navarosii» dy Krymu, hučyć užo hadoŭ dziesiać. Ahresiju vyklikaŭ razvarot Ukrainy na zachodni kurs, a nia toje, što Pucin za bratana Janukoviča pakryŭdziŭsia.

A słovy sotnika byli nie pryvatnym mierkavańniem. Heta jakraz, skažam, Jacaniuk vykazvaŭsia za siabie.

Vielmi sumna, što hety čałaviek usurjoz ličyć kancepcyju «lažać-bajacca» panacejaj ad ahresii neasavieckaha imperyjalizmu. Kali b ludzi pasłuchali tady palitykaŭ, ukraincy b najchutčej stracili b tuju adnosnuju svabodu, a hramadztva b jašče doŭha nie mahło b adyjści ad rasčaravańnia, ich viera ŭ ideały dy samich siabie zastałasia b utaptanaj u razłamanuju brukavanku na płoščy. A achviara zahinułych była b zmarnavanaja.

«Dyk što — lepiej vajna? Chto adkaža za aneksiju Kryma?» — zadajecca pytańniami dziajač. Tut havaryć pra toje, što niežadańnie žyć u imperyi jość vinoj ŭkraincaŭ u ahresii – heta žachlivaje spałučeńnie palityčnaj biestałkovaści ź biespryncypnaściu. I niachaj nas Boh ubieraže ad takich palitykaŭ.

• 0
• 0
• 0
• 0
• 0
• 0
• 0
• 0