Alaksandr Łukašenka, jaki 17 sakavika pryznačyŭ šerah novych kiraŭnikoŭ miascovych vykanaŭčych orhanaŭ, zapatrabavaŭ ad ich nie dapuskać faktaŭ pierasadžvańnia čynoŭnikaŭ, jakija pravalili svaju pracu, na inšyja «ciopłyja» miescy.
«Tut łajdačyŭ, a vy jaho cichieńka pieraviali na inšuju pasadu. Hetaha nie pavinna być, — skazaŭ Łukašenka.
— Kadry pavinny razumieć: pracuješ — honar i pašana, pravalili pa svajoj vinie — my nie suprać taho, kab ty pracavaŭ, ale kali ty, aprača miatły, ničoha nie ŭmieješ trymać, — biary miatłu, kali ty nastaŭnik — vykładaj u škole, kali ty inžynier pa śpiecyjalnaści — idzi majstram u sielhastechniku ci jašče kudyści».
«Kali my heta nie vykaranim — budzie toje ž samaje, što karupcyja. Jany pavinny adčuvać adkaznaść. Na hetyja pytańni treba źviarnuć surjoznuju ŭvahu», — zajaviŭ kiraŭnik dziaržavy. Jon taksama zapatrabavaŭ ad Administracyi prezidenta pastajanna trymać adpaviednyja pytańni na kantroli pa ŭsioj viertykali ŭłady.
U čas razmovy z novymi kiraŭnikami miascovych vykanaŭčych orhanaŭ Łukašenka zrabiŭ akcent na nieabchodnaści vychadu na efiektyŭnuju vytvorčaść, u tym liku ŭ sielskaj haspadarcy, i papiaredziŭ, što lohkaha žyćcia i vialikich abjomaŭ dziaržaŭnaj padtrymki čakać nie varta.
«Sielskuju haspadarku treba pryvodzić u prytomnaść. My nie možam tak finansavać i padtrymlivać viosku, jak raniej.
Pa roznych pryčynach. U nas jość peŭnyja abaviazacielstvy i ŭ Mytnym sajuzie, — skazaŭ Łukašenka. — Pa-druhoje, u nas užo namieciłasia tendencyja da ŭtrymanstva. My ž z vami pracavali ŭ sielskaj haspadarcy, vy viedajecie: prasi bolš, daduć krychu mienš».
Pavodle słoŭ kiraŭnika dziaržavy, zaraz idzie aktyŭnaja praca hrupy pa vioscy, jakuju ŭznačalvaje premjer-ministr Michaił Miaśnikovič.
«U chutkim časie my vyjdziem na peŭnyja rekamiendacyi, vyvučyŭšy situacyju prykładna tak, jak było pa budaŭnictvie, — zaznačyŭ Łukašenka. — Ale miery adny: čas užo zarablać. Niedzie macniejšaja haspadarka, niedzie słabiejšaja. Staršynia rajvykankama ŭ hetaj situacyi stanovicca niejkim vuzłavym źvianom dla raźviazki prablem i kiravańnia ŭsim kompleksam».
Łukašenka źviarnuŭ uvahu kiraŭnikoŭ miascovaj viertykali ŭłady na toje, što ŭsie pradpryjemstvy na terytoryi rajonaŭ, niezaležna ad form ułasnaści, znachodziacca ŭ ich zonie adkaznaści.
«Jakoje b tam pradpryjemstva ni było — pryvatnaje, dziaržaŭnaj formy ułasnaści, akcyjaniernaje tavarystva — vy za heta adkazvajecie. Tamu što tam pracujuć našy ludzi, za jakich vy niesiacie adkaznaść. Pa-druhoje, tam padatkovaja baza, a padatki — heta žyćcio dziaržavy», — padkreśliŭ jon.
U hetym płanie Łukašenka raskrytykavaŭ staršyniaŭ vykankamaŭ, jakija samaŭchilajucca i nie ŭnikajuć u prablemy pryvatnych pradpryjemstvaŭ, i zapatrabavaŭ žorstka kantralavać adpaviednyja pytańni. «Heta pravy čałavieka. Prava na pracu, na jaho pierśpiektyvu. Jon pavinien bačyć pierśpiektyvu, što jon budzie pastajanna pracavać i karmić svaju siamju», — zaznačyŭ kiraŭnik dziaržavy.
Nahadajem, 17 sakavika Łukašenka daŭ zhodu na pryznačeńnie Andreja Mularčyka staršynioj Pinskaha harvykankama, Uładzimira Aniščyka — Śvisłackaha rajvykankama, Viktara Kata — Vilejskaha rajvykankama, Dźmitryja Małašenki — Kaściukovickaha rajvykankama. Jon taksama pryznačyŭ inšych čynoŭnikaŭ, dypłamataŭ i ŭzhadniŭ pryznačeńnie šerahu kiraŭnikoŭ pradpryjemstvaŭ.
Ciapier čytajuć
Pamiatajecie Taćcianu Zareckuju, jakaja sa skandałam zvalniałasia z Kabinieta Cichanoŭskaj? U Estonii jaje padazrajuć u machlarstvie49
Kamientary