Polskija ŚMI raskazali jašče pra dva epizody ź biełaruskimi špijonami

Vydvareńniu biełaruskaha vajskovaha ataše Dźmitryja Žukava papiaredničali jašče dva epizody, źviazanyja ź biełaruskimi špijonami. Pra heta paviedamlaje gazetaprawna.pl. 

Nahadajem, polskaja «Hazieta vyborča» 13 sakavika paviedamiła ab zatrymańni dvuch biełarusaŭ, padazravanych ŭ špijanažy na karyść Rasii. Pavodle infarmacyi vydańnia, adzin z zatrymanych — biełaruski vajenny ataše — byŭ złoŭleny na tym, što fatahrafavaŭ vajenny abjekt u Bydhoščach (vučebny centr NATO). Na prośbu Ahienctva ŭnutranaj biaśpieki jon razam z žonkaj pakinuŭ Polšču.

MZS Biełarusi abvierhła infarmacyju pra zatrymańnie biełarusaŭ na terytoryi Polščy.

 «Što da ratacyi supracoŭnikaŭ pasolstvaŭ i jaje matyvaŭ, to biełaruski bok, nie majučy na toje naležnych padstavaŭ, nie kamientuje ŭnutranyja pytańni funkcyjanavańnia Dypłamatyčnaj słužby RB, jak i dypłamatyčnaha korpusa, akredytavanaha ŭ Respublicy Biełaruś», — paviedamiŭ 14 sakavika pres-sakratar MZS Biełarusi Dźmitryj Mirončyk.

Tym časam polskaje vydańnie ahučyła niekatoryja padrabiaznaści historyi sa špijanažam. Pavodle infarmacyi gazetaprawna.pl, departavany z Polščy vajskovy ataše šukaŭ «kantakty z tavarystvami vieteranaŭ Vojska Polskaha, vajskovymi piensijanierami, a taksama z moładździu z charcerskaha i straleckaha sajuzaŭ i rekanstrukcyjnych hrup. Jon časta byvaŭ na takoha kštałtu mierapryjemstvach».

Rašeńniu ab vydvareńni vajskovaha ataše papiaredničali jašče dźvie historyi, źviazanyja ź biełaruskimi špijonami. Hetak, niekalki miesiacaŭ tamu kontrvyviedka Ahiencyi ŭnutranaj biaśpieki Polščy zatrymała jašče adnaho biełarusa, jaki taksama fatahrafavaŭ vajskovyja abjekty. Sud vyrašyŭ uziać jaho pad vartu.

Pavodle nieaficyjnaj infarmacyi, padazravany pracavaŭ na vajskovuju vyviedku Biełarusi, časta byvaŭ u Polščy: jašče niadaŭna jon vučyŭsia ŭ polskim VNU dy atrymlivaŭ stypiendyju.

Aproč taho, bolš jak dva hady znachodzicca pad aryštam u Polščy i biełarus Alaksandr B., jaki, pavodle infarmacyi vydańnia, niekalki hadoŭ supracoŭničaŭ z aficerami ciapier ŭžo likvidavanaj Vajskovaj infarmacyjnaj słužby Polščy.

Jon ličyŭsia krynicaj u biełaruskich śpiecsłužbach i adnačasova supracoŭničaŭ z palakami. Za sakretnuju infarmacyju jamu zapłacili bolš za 300 tysiač dołaraŭ.

Paśla likvidacyi Vajskovaj infarmacyjnaj słužby palaki praanalizali atrymanyja ad jaho źviestki i pryjšli da vysnovy: Alaksandr B. byŭ dezynfarmataram i vykonvaŭ zahady svajho načalstva ŭ Minsku.

«Infarmacyja, jakuju atrymlivaŭ Minsk, mahła była być pradmietam analizu ŭ Maskvie. U Biełarusi i Rasii supolnaja vyviedka pa amierykana-brytanskim ŭzory. Abiedźvie krainy dzielacca infarmacyjaj pa stratehičnych pytańniach», — havorycca ŭ artykule.

• 0
• 0
• 0
• 0
• 0
• 0
• 0
• 0