8 krasavika ŭ Mikałaja Aŭtuchoviča zakančvajecca termin adbyćcia pakarańnia, i jon pavinien vyjści z turmy, paviedamiła jahonaja advakatka Taciana Čyhak.
Siońnia ŭ Leninskim rajonnym sudzie Horadni adbyŭsia papiaredni razhlad skarhi Mikałaja Aŭtuchoviča na vykarystańnie adnosna jaho mieraŭ spahnańnia. Sprava, pryznačanaja na sieradu, budzie razhladacca z vyjezdam na miesca adbyćcia pakarańnia — u turmu № 1 na vulicy Kirava ŭ Horadni. Jaŭka Aŭtuchoviča na sudovaje pasiedžańnie była pryznanaja abaviazkovaj, zaznačyła Taciana Čyhak.
Asudžanaha buduć dapytvać, a jon budzie davać svaje tłumačeńni pra akaličnaści spahnańniaŭ, nakładzienych na jaho administracyjaj turmy.
Dvojčy jamu dali vymovu i adzin raz źmiaścili ŭ štrafny izalatar. Sam jon hetyja spahnańni ličyć niezakonnymi, patłumačyła advakatka. Aŭtuchovič ličyć, što nijakich parušeńniaŭ ź jahonaha boku nie dapuskałasia. Hetaja skarha i budzie pradmietam daśledavańnia na vyjaznym pasiedžańni sudu, usie akaličnaści, što ŭ joj ukazanyja, udakładniła advakatka. Buduć dapytvać śviedak jak z boku administracyi turmy № 1, tak i z boku Aŭtuchoviča.
U vypadku, kali spahnańni pryznajuć nieabhruntavanymi, budzie pierahladacca i rašeńnie ab vykarystańni ŭ dačynieńni da Aŭtuchoviča mieraŭ preventyŭnaha nahladu.
Hetaje rašeńnie było pryniataje dniami. Adnak Tacianie Čyhak nieviadoma, jakija ŭ im praduhledžanyja abmiežavańni dla Mikałaja Aŭtuchoviča paśla vyzvaleńnia.
U 2009 hodzie palitviaźnia Mikałaja Aŭtuchoviča paŭtorna źniavolili, hetym razam na piać hadoŭ i dva miesiacy. Padstavaj stali piać palaŭničych patronaŭ: artykuł 295 častka 3 Kryminalnaha kodeksu — «niezakonnyja dziejańni adnosna ahniastrelnaj zbroi, bojeprypasaŭ i vybuchovych rečyvaŭ».
Ciapier čytajuć
Pamiatajecie Taćcianu Zareckuju, jakaja sa skandałam zvalniałasia z Kabinieta Cichanoŭskaj? U Estonii jaje padazrajuć u machlarstvie49
Kamientary