Pošta na kołach. U nievialikich viosačkach Mahiloŭskaj vobłaści zamiest nierentabielnych stacyjanarnych paštovych adździaleńniaŭ ciapier pracujuć pierasoŭnyja punkty. U Kruhlanskim rajonie, da prykładu, taki počtamobil pracuje ŭžo nie pieršy miesiac. Da novaŭviadzieńnia miascovyja žychary pryzvyčailisia i paśpieli acanić pasłuhu.
Jak tolki zahuŭ hienieratar, u Alšanikach viedajuć — pryjechała pošta. Viosačka znachodzicca ŭsiaho-tki ŭ 5 kiłamietrach ad rajcentra Kruhłaje. Paštovaha adździaleńnia tut nikoli nie było. Miascovaja žycharka Nadzieja Filipava ŭzhadvaje: raniej, navat kab za śviatło zapłacić, davodziłasia jechać ŭ Kruhłaje. U asnoŭnym, pieššu abo na rovary, a kali pašancuje, to na aŭtobusie. Sa źjaŭleńniem mabilnaj pošty ŭ Alšanikach i žyć stała viesialej, kažuć viaskoŭcy razam z Nadziejaj Filipavaj:
«I śviatło apłacić, i ŭsie kamunalnyja pasłuhi, na telefon hrošy pakłaści. Viadoma, nas zadavalniaje. Pažadana, kab jany zaŭsiody pryjazdžali da nas».
Pryjezd mabilnaj pošty ŭ susiednija Zaharany akurat supadaje ź pierasmienkaj na fiermie, čamu nievymoŭna radyja jaje rabotnicy: žančyny śpiašajucca za śviežymi praduktami. Poštamabil sumiaščaje ŭ sabie i funkcyi praduktovaj aŭtałaŭki. U hetaj viosačcy, u adroźnieńnie ad susiedniaj, stacyjanarnaje paštovaje adździaleńnie pracavała nie adzin dziasiatak hadoŭ. Ale z-za nierentabielnaści poštu začynili. Tym samym prymusili nie na žart pachvalavacca miascovych žycharoŭ. Halina Fiedarovič kaža:
«Nie było dzie za śviatło zapłacić, ničoha. A ciapier možna i kredyt apłacić, i łatarejki možna kupić — moža mašynu vyjhraju.
Viktoryja Zavadskaja, načalnik pierasoŭnaha adździaleńnia paštovaj suviazi:
«Zaraz my jeździm pa adładžanym maršrucie. Pryjazdžajem padčas ŭsiudy. Ludzi nas užo čakajuć. Kruhlanski počtamobil absłuhoŭvaje ŭžo piać viosak u rajonie. U bližejšy čas śpis pavinien papoŭnicca jašče dvuma».
Pa słovach rabotnikaŭ pošty, kožny taki mabilny punkt moža absłuhoŭvać terytoryju, na jakoj žyvuć nie mienš za tysiaču čałaviek. Zaraz na Mahiloŭščynie pracuje ŭžo 22 takija pošty na kołach.
Kamientary