Zatrymany ŭ Polščy «špijon» pracavaŭ u Hrodzienskim univiersitecie i haziecie
List u redakcyju Gazety Wyborczej pryjšoŭ u kanviercie sa zvarotnym adrasam — śledčy izalatar, vulica Rakavieckaja, Varšava. Jaho aŭtar, biełarus Juryj K. z Hrodna pa-polsku, z pamyłkami, prosić ab dapamozie: «Źviartajusia da Vas za dapamohaj svabodnaha słova ŚMI. Ja ščyra spadziajusia, što Vy budziecie mieć śmiełaść pravieści ŭłasnaje rasśledavańnie i vyśvietlić praŭdu».
«Fantazior niejki…»
Juryj K., jaki pradstaŭlajecca jak žurnalist i vykładčyk Hrodzienskaha dziaržaŭnaha ŭniviersiteta imia Janki Kupały, 17 lutaha byŭ «brutalna zatrymany i abvinavačany ŭ špijanažy supracoŭnikami Ahienctva ŭnutranaj biaśpieki Polščy».
Zatrymańnie adbyłosia na vakzale ŭ Bydhaščy, dzie, jak piša Juryj K., ahienty «brutalna pavalili» jaho na ziamlu. Što jon rabiŭ tam? Śćviardžaje, što pračytaŭ pra toje što horad źjaŭlajecca «polskaj stalicaj NATA» (u Bydhaščy raźmiaščajecca nataŭski navučalny centr), i chacieŭ zrabić repartaž pra «kanfrantacyju pamiž Rasiejaj i NATA i nastupstvy hetaha supraćstajańnia dla Biełarusi».
Jon śćviardžaje, što ŭsiudy, dzie jon byŭ, pradstaŭlaŭsia karespandentam haziety «Viečiernij Hrodno», ad jakoj atrymaŭ zamovu na repartaž, fatahrafavaŭ abjekty, zdymki jakich jość u internecie, i nie ŭvachodziŭ tudy, kudy «było zabaroniena».
Ciapier jon siadzić u turmie pa abvinavačvańni ŭ špijanažy, za što ŭ Polščy pahražaje ad troch hadoŭ pazbaŭleńnia voli.
Spravu biełarusa viadzie Varšaŭskaja apielacyjnaja prakuratura, ale akramia taho, što Juryja K. pasadzili za kraty za špijanaž u Polščy, jana nie choča raspaviadać nijakich padrabiaznaściaŭ, tamu što sprava źjaŭlajecca tajnaj.
Ale nieaficyjna adzin z prakuroraŭ kaža: «Dziŭny hety špijon. Chutčej, niejki fantazior, jaki ŭlez u surjoznuju historyju».
Fotaaparat poŭny zdymkaŭ
Pasolstva Biełarusi ŭvahi Juryja K. nie nadaje. Juryj atrymaŭ tolki dziaržaŭnaha advakata.
Biełarus zdymaŭ u Bydhaščy, dzie akramia niekalkich vajennych abjektaŭ znachodzicca vyšejzhadany navučalny centr NATA. Jon raźmieščany na ŭskrainie horada i aharodžany ščylnym płotam. Pavodle infarmacyi krynic u AUB Polščy, Juryj rabiŭ zdymki ź vierchnich pavierchaŭ bližejšych šmatpaviarchovak. Za im adtul i da vakzała sačyli ahienty.
«Prablema ŭ tym, što jon zusim nie chavaŭsia, pavodziŭ siabie, jak u tannym papularnym filmie — jak byccam by chacieŭ, kab jaho zatrymali», — kaža aficer AUB. I dadaje: «U nas nie było vyjścia, my pavinny byli jaho ŭziać. U fotaaparacie było poŭna fatahrafij vajskovych abjektaŭ, pryčym nie tolki z Bydhašča. Praviarajem, dzie jašče jon byŭ».
«Korpaŭsia ŭ stałach»
A što pra Juryja kažuć u Hrodna? Jamu 34 hady, u jaho jość žonka i maleńkaja dačka. Na praciahu apošnich 10 hadoŭ jon pracavaŭ vykładčykam na fakultecie ekanomiki i kiravańnia Hrodzienskaha dziaržaŭnaha ŭniviersiteta.
Jon taksama pracavaŭ u «Viečierniem Hrodno» — łajalnaj da Łukašenki haziecie, nie jak žurnalist, a jak dyrektar pa markietynhu na paŭstaŭki.
Byłyja kalehi pa pracy adhukajucca pra jaho niehatyŭna: «Ja pamiataju, što jon korpaŭsia ŭ našych kampjutarach, z hetaj nahody navat byŭ skandał. Jon byŭ ślizkim, ad jaho chaciełasia trymacca dalej», — uspaminaje adna z žurnalistak.
Napisańniem repartažaŭ jon nie zajmaŭsia. Adziny karotki tekst byŭ napisany im u krasaviku 2013 hoda i tyčyŭsia cenaŭ u pamiežnym Biełastoku, jaki časta naviedvajuć biełarusy.
«Paśla zvalnieńnia jon na nas užo nie pracavaŭ i ničoha nie pisaŭ», — kaža hałoŭnaja redaktarka «Viečiernieho Hrodno» Ina Maksimčyk.
Hanaryŭsia tym, što słužyŭ u śpiecnazie
Viadoma, što ŭ 2002—2003 hadach Juryj słužyŭ u 5-j asobnaj bryhadzie śpiecyjalnaha pryznačeńnia. Hetaja častka ličycca samaj elitnaj u biełaruskich uzbrojenych siłach. U časy SSSR bryhada naležała HRU.
Na staroncy ŭ «Odnokłaśśnikach» poŭna fotazdymkaŭ, dzie Juryj paziruje z roznymi vidami zbroi.
KDB hetuju spravu nie kamientavaŭ.
Kamientary