Pucin nie źbirajecca vypuskać lejcy
U rasiejskaha prezydenta budzie svoj referendum. Piša ŭ błohu Alaksandar Kłaskoŭski.
Siońnia Pucin vyrazna daŭ zrazumieć, što nie źbirajecca vypuskać lejcy paśla skančeńnia svajho druhoha terminu. Samo pa sabie heta nia dziva. Cikavyja detali.
Faktyčna jon pieratvaraje dumskija vybary ŭ referendum ab daviery svajoj personie. Tak i skazaŭ, pramaŭlajučy pierad krasnajarskaj pracoŭnaj klasaj: "Voś kali ludzi prahałasujuć za "Adzinuju Rasieju", śpis jakoj ja ŭznačalvaju, heta aznačaje, što jany mnie daviarajuć".
Sa słoŭ rasiejskaha prezydenta, heta daść jamu "maralnaje prava" zapytać potym z usich, chto budzie pracavać u Dumie i va ŭradzie. Zachoŭvajučy intryhu, jon nia staŭ tłumačyć, u jakim mienavita amplua budzie "zapytvać". Zrešty, heta ŭžo sprava techniki.
Admietna, što biełaruskija dziaržaŭnyja medyi źjedliva kamentujuć namiery Pucina padoŭžyć znachodžańnie va ŭładzie. Chacia, zdavałasia b, naadvarot, voś vam prykład pierajmańnia biełaruskaha dośviedu, arhument na karyść Alaksandra Łukašenki!
Adnak tut, musić, pieravažvaje niepryjemnaje pradčuvańnie, što i nadalej tre' budzie mieć spravu z tym samym "niemcam u Kramli", jaki navat pry sustrečach tet-a-tet ź biełaruskim kaleham, zdajecca, va ŭpor jaho nia bačyć...
I dla biełaruskaj hramady ničoha dobraha u takoj perspektyvie niama. Cyvilizavanaja ratacyja rasiejskaj ŭłady była b dobrym maralnym, pijaraŭskim čyńnikam. Ale ž nia toj trend u palityčnym žyćci ŭschodniaj susiedki...
I naadvarot: pakolki rasiejski adkat da aŭtarytaryzmu, faktyčna da zavualavanaj manarchii vyklikaje krytyku z boku Zachadu, to ŭ Kramla bolej spakusy ŭciahnuć u svaje vajskova-stratehičnyja hulni Biełaruś.
Kamientary