Śledčy kamitet zaviaršyŭ rasśledavańnie ŭ dačynieńni da byłoha hiendyrektara AAT «Fandok» (Babrujsk) Uładzimira Majko, jaki padazrajecca ŭ złoŭžyvańni ŭładaj abo słužbovymi paŭnamoctvami.
Nahadajem, na praciahu 2013—2014 hadoŭ u dačynieńni da Majko byli raspačatyja try spravy na padstavie č. 3 art. 424 Kryminalnaha kodeksa (złoŭžyvańnie ŭładaj abo słužbovymi paŭnamoctvami). Padstavaj pasłužyli materyjały pravierki, praviedzienaj supracoŭnikami UKDB pa Mahiloŭskaj vobłaści, ABEZ UUS Babrujskaha rajvykankama. Mieraj strymańnia dla byłoha hiendyrektara abranaje asabistaje paručycielstva, jakoje dziejničaje i ciapier.
«Były hienieralny dyrektar padpisaŭ akty pryjomki-zdačy za faktyčna nie vykananyja ŭ poŭnym abjomie raboty pa madernizacyi i ŭvodzie ŭ ekspłuatacyju linii sartavańnia kruhłaha lesu, a taksama ab vykanańni šefmantažnych i puskanaładačnych rabot pa budaŭnictvie mini-CEC», — paviedamiŭ BiełaPAN aficyjny pradstaŭnik USK pa Mahiloŭskaj vobłaści Aksana Salaniuk.
Pavodle jaje słoŭ, ź lipienia pa listapad 2007 hoda Majko, dziejničajučy ź inšaj asabistaj zacikaŭlenaści, daŭ ukazańnie padnačalenym rabotnikam na afarmleńnie dakumientaŭ i adhruzku šlifavanaj faniery na adras rasijskich firm za canu značna nižejšuju, čym na biržy. U vyniku hetaha «Fandoku» byŭ pryčynieny ŭron (roźnica pamiž biržavoj canoj i canoj pastaŭki) bolš jak na 70 młn. rubloŭ.
«U vyniku ŭsich niepravamiernych dziejańniaŭ hienieralnaha dyrektara AAT «Fandok» pryčynieny ŭron bolš jak na 770 młn. rubloŭ», — paviedamiła Salaniuk, adznačyŭšy, što zaraz nakładzieny aryšt na majomaść abvinavačanaha koštam pryblizna 1,8 młrd. rubloŭ. Akramia taho, były hiendyrektar kampiensavaŭ uron u 199 młn. rubloŭ.
Materyjały kryminalnaj spravy ŭ abjomie 33 tamoŭ pieradadzienyja ŭ prakuraturu dla pryniaćcia rašeńnia ab nakiravańni ŭ sud.
Kamientary