Z novaha navučalnaha hoda ŭ školnych bufietach uvodziacca dadatkovyja abmiežavańni na prodaž fastfudu
Z novaha navučalnaha hoda ŭ školnych bufietach Biełarusi ŭvodziacca dadatkovyja abmiežavańni na handal fastfudam: pradavać picu, smažanki i sasiski ŭ teście dazvolena nie bolš jak dva razy na tydzień, paviedamiła zahadčyca adździaleńnia hihijeny dziaciej i padletkaŭ Respublikanskaha centra hihijeny, epidemijałohii i hramadskaha zdaroŭja Ała Małachava 25 žniŭnia na pres-kanfierencyi ŭ Minsku.
Pavodle jaje słoŭ, asartymientny pieralik školnych bufietaŭ byŭ uviedzieny ŭ Biełarusi ŭ 2004 hodzie, bo tady «bufiety pieratvarylisia ŭ śmietnik, dzie realizoŭvalisia lubimyja dziećmi niekarysnyja pradukty». Z tych por pieralik praduktaŭ pastajanna pierahladajecca, bo pradpryjemstvy handlu karystajucca situacyjaj i, naprykład, «pry zabaronie pradavać kalarovyja hazavanyja napoi pradavali nieafarbavanyja sałodkija hazavanyja napoi, jakija zaraz taksama zabaronienyja». Ciapier u bufietach možna budzie pradavać tolki napoi, pryhatavanyja ŭ stałovaj.
Školnyja stałovyja abaviažuć stvarać umovy dla padahrevu ježy. U jakaści ahulnaŭmacavalnaha praduktu ŭ asartymient bufietaŭ uviedzieny hiematahien, ale nie čaściej jak dva razy na tydzień.
«Kali školnikaŭ nie abmiažoŭvać, jany kuplajuć pa piać-šeść smažanak, — skazała zahadčyca adździaleńnia hihijeny dziaciej i padletkaŭ. — My vymušanyja vykarystać zabaronnyja miery, bo ŭ Biełarusi pavialičvajecca kolkaść dziaciej z zališniaj masaj cieła. Nastupstvy lišniaj vahi ŭ dziaciej — dyjabiet druhoha typu, a taksama arteryjalnaja hipiertenzija».
Pavodle źviestak Ministerstva achovy zdaroŭja, u apošnija 10 hadoŭ kolkaść padletkaŭ z zališniaj vahoj pavialičyłasia ŭ dva razy, a chvorych na cukrovy dyjabiet — u paŭtara. Miedyki źviazvajuć heta ź nie zbałansavanym pa jakaści i kałaryjnaści charčavańniem.
Dla zachavańnia zdaroŭja dziaciej, pavodle słoŭ Małachavaj, važnaja pravilnaja arhanizacyja damašniaha i školnaha charčavańnia. Śpiecyjalist padkreśliła, što «baćki majuć prava cikavicca, čym i jak kormiać ich dziaciej», i ŭnutrany kantrol vielmi važny, bo, zhodna z zakanadaŭstvam, płanavyja pravierki prachodziać u stałovych nie čaściej jak raz na hod.
Ciapier čytajuć
Łukašenka raskazaŭ pra zabojstva apazicyjaniera, jakoje nibyta adbyłosia try dni tamu18
Kamientary