Mova – biełaruskaja, Minsk – kitajski. Viersija Viktara Marcinoviča

Kolki tydniaŭ prastory sieciva virujuć zhadkami i intryhoŭnymi namiokami pra vychad novaha ramana Viktara Marcinoviča.

10 vieraśnia 2014 hoda! Ciapier užo dakładna i aficyjna! Kampanija «Budźma biełarusami!» pradstaŭlaje novy raman Viktara Marcinoviča «Mova» i zaprašaje ŭ 19.00 u kniharniu «łohvinaŬ» na aŭtohraf-siesiju aŭtara knihi.

Viktar Marcinovič – sioletni pryzior Jeŭrapiejskaha tavarystva navukovaj fantastyki, paśpiachovy sučasny biełaruski aŭtar i adzin z samych čytanych aŭtaraŭ sajta budzma.by. Jaho debiutny raman «Paranoja» vyjšaŭ pa-anhlijsku ŭ ZŠA, a dniami budzie prezientavany i na niamieckaj movie. Biełaruskamoŭnaja viersija ramana «Sfahnum» u 2013 hodzie ź niečuvanaj dla biełaruskaj litaratury chutkaściu razyšłasia pa čytačach.

«Mova» – novy žanravy ekśpierymient Viktara, sacyjalnaja fantastyka z «movaj» u jakaści hałoŭnaha hieroja. Dziejańnie ramana adbyvajecca ŭ, spadziajemsia, fantastyčnaj budučyni – Kitaj i Rasija adździalilisia muram ad Jeŭropy, jakaja straciła svaju vielič, i ŭtvaryli kvitniejučuju sajuznuju dziaržavu. Centr Minska pieratvaryŭsia ŭ hustanasieleny kitajski kvartał. Hałoŭny hieroj knihi razam ź minskim padpollem (kitajskaj mafijaj) zmahajucca ź sistemaj, u jakoj dabro i zło, aśvietniki i złačyncy, viernaść i zdrada pamianialisia miescami.

«U hetym tekście mova vystupaje nie tolki jak srodak kamunikacyi, ale i ŭ novaj, dahetul nikim nie skarystanaj funkcyi. Mova źjaŭlajecca tajamnicaj i pryčynaj vajny vuličnych bandaŭ. Tema adnosinaŭ ź litaraturnaj spadčynaj nabyvaje pryncypova inšaje, hanhstarskaje hučańnie – hety padychod nie vykarystoŭvaŭ nichto nie tolki ŭ biełaruskaj, ale i ŭ suśvietnaj litaratury», – adznačaje Viktar Marcinovič. «Dla mianie heta było vielmi pryncypovym momantam – nie stvarać čarhovaha «Dastajeŭskaha pa-biełarusku», nie zapaŭniać łakuny ŭ našaj łakalnaj prozie, ale vyrašać mienavita internacyjanalnyja zadačy, pryčym pryncypova rabić heta na rodnaj movie. U hetym sensie nazvaj knihi pryncypova było abranaje słova «mova», jakoje dla kožnaha biełarusa siońnia, u 2014-m, źjaŭlajecca mocnym, etyčna zaradžanym markieram: tych, chto roŭna dychaje da «movy», u hramadstvie niama zusim. Ja ŭziaŭ hetaje słova i prapanavaŭ pryncypova inšaje jaho čytańnie, atačyŭšy novaj mifałohijaj, novym kibierhučańniem, jakoje, spadziajusia, budzie dobraj nahodaj dla pierajmańniaŭ. Pradbaču tatuchi z vyjavaj «moŭnych» ijerohlifaŭ, street art z vyjavami «ŭ», pierfomansy na płoščy Miortvych i źjaŭleńnie pravadnikoŭ pa niabačnym pakul mienskim Čajnataŭnie».

Papiaredni raman Viktara «Sfahnum» vychodziŭ u dźviuch viersijach (papiarovaje vydańnie pa-biełarusku i elektronnaje pa-rusku). Dalej – bolej! Novy raman «Mova» možna adšukać až u troch viersijach!

Papiarovy varyjant na biełaruskaj movie ad vydaviectva «Knihazbor», vydadzieny dziakujučy kampanii «Budźma biełarusami!», užo možna znajści ŭ staličnych kniharniach, a nieŭzabavie – i ŭ kramach pa-za Minskam.

Vydańniem drukavanaha varyjanta ramana na ruskaj movie (pierakład Lidzii Michiejevaj) zajmajecca vydaviectva «Łohvinaŭ», a elektronnaja ruskamoŭnaja viersija ramana padrychtavanaja multymiedyjnym vydaviectvam «Piaršak» (34mag.net): knihu možna budzie spampavać na jaho sajcie http://34mag.net/piarshak/category/books/.

Pra aŭtara

Viktar Marcinovič (1977) — biełaruski piśmieńnik, žurnalist, mastactvaznaŭca. Skončyŭ fakultet žurnalistyki i aśpiranturu BDU. Namieśnik hałoŭnaha redaktara hramadska-palityčnaha štotydniovika «BiełHazieta», vykładčyk Jeŭrapiejskaha humanitarnaha ŭniviersiteta. U 2008 hodzie abaraniŭ doktarskuju dysiertacyju i atrymaŭ navukovuju stupień (PhD) pa historyi mastactvaŭ.

Viadzie kałonku «Kulturyzm» na partale budzma.by i aŭtarskuju kałonku ŭ multymiedyjnym časopisie 34mag.net.

U 2012 hodzie aŭtar byŭ uznaharodžany litaraturnaj premijaj «Debiut» imia Maksima Bahdanoviča, u 2013 uvajšoŭ u doŭhi śpis rasijskaj premii «Nacbiest», u 2014 atrymaŭ premiju (Encouragement Award) Jeŭrapiejskaha tavarystva navukovaj fantastyki (European Science Fiction Society).

Pra inšyja tvory aŭtara

Pieršy raman Marcinoviča «Paranoja» (2009), vypuščany rasijskim vydaviectvam «AST», atrymaŭ šyroki rezanans u biełaruskaj miedyjaśfiery. Hety raman pra kachańnie, napisany ŭ žanry reality-antyŭtopii, byŭ paśla pierakładzieny na anhlijskuju, finskuju, niamieckuju movy i vydadzieny ŭ ZŠA, Finlandyi i Hiermanii.

Apovieść Marcinoviča «Tabu» ŭ 2010 h. była pierakładzienaja na anhielskuju movu i apublikavanaja ŭ zborniku Best European Fiction 2011.

Druhi raman Viktara Marcinoviča «Ściudziony vyraj» (2011) staŭ premjernym tvoram biełaruskaj litaratury, vydadzienym u vyhladzie internet-relizu. Hety «raman z patrojnym samahubstvam aŭtara», pryśviečany biełaruskaj litaratury, u 2012 h. prynios Marcinoviču litaraturnuju premiju «Debiut» imia M. Bahdanoviča ŭ naminacyi «Proza».

Treci raman Marcinoviča, hanhstarskaja trahikamiedyja «Sfahnum» (2013), uvajšoŭ u doŭhi śpis rasijskaj premii «Nacyjanalny biestsieler». «Sfahnum» byŭ vypuščany na ruskaj movie ŭ vyhladzie internet-relizu, a ŭ pierakładzie na biełaruskuju movu — u drukavanaj viersii.

 Fota - Pink Gibbon, inspired by JobProduction

• 0
• 0
• 0
• 0
• 0
• 0
• 0
• 0