Mnoha nie byvaje: siońnia adznačajecca Mižnarodny dzień myćcia ruk

15 kastryčnika ŭ śviecie adznačajuć Mižnarodny dzień myćcia ruk. U hety dzień pryniata nahadvać ab važnaści takoha prosta dziejańnia, jak myćcio ruk z myłam.

Pavialičyć

Uvohule, da siaredziny XIX stahodździa navat u praśvietlenaj Jeŭropie nie praktykavałasia sistematyčnaje myćcio ruk. Usio źmianiŭ vienhierski terapieŭt Ihnac Ziemielvajs. Ziemielvajs słužyŭ u Vienskim kliničnym špitali, pry jakim pracavali dva radzilnyja damy. U pieršym ź ich śmiarotnaść była na nievysokim uzroŭni, ale ŭ druhim časam dasiahała 30%.

Ziemielvajs zacikaviŭsia takoj roźnicaj u ličbach, ale doŭha nie moh znajści pryčynu. Adkaz pryjšoŭ razam z trahičnaj śmierciu siabra Ziemielvajsa Jakaba Kolečki. Padčas uskryćcia trupa toj parezaŭsia skalpielem i pamior. Kliničnyja prajaŭleńni chvaroby Kolečki nahadvali prajaŭleńni paślarodavaj harački, ad jakoj žynčyny pakutavali ŭ roddomie.

Akazałasia, što ŭračy kliniki z vysokaj śmiarotnaściu pravodzili mnoha aŭtapsij trupaŭ dla adukacyi studentaŭ.

Rody ž išli prymać ź niamytymi rukami — tady jašče nie viedali ab roli patahiennych mikraarhanizmaŭ. Adnak Ziemielvajs dapuściŭ, što lichamanku vyklikajuć niejkija «trupnyja čaścicy», i prapanavaŭ piersanału myć ruki chłornaj vapnaj. Vyniki novaŭviadzieńnia byli prosta ašałamlalnymi: śmiarotnaść źniziłasia na 90%, da ŭzroŭnia kala 2%. U 1848 hodzie ŭ raddomie navat uviali žorstki kantrol za myćciom ruk. Niahledziačy na statystyku, adkryćcio Ziemielvajsa nie pryniali surjozna — tolki praz 20 hadoŭ, kali była dakazanaja mikrabijałahičnaja pryroda zachvorvańniaŭ, miedycyna stała sterylnaj.

Adnak i siońnia miljony ludziej pa ŭsim śviecie, zvyčajna praź biednaść, nie myjuć ruki.

Ale hetaja prostaja pracedura značna pamianšaje ryzyku padchapić jakuju-niebudź infiekcyju. Heta nahladna demanstruje ekśpierymient, praviedzieny ŭ pakistanskim horadzie Karačy ŭ 2003 hodzie. Tam siemjam u biednym rajonie ciaham 9 miesiacaŭ biaspłatna razdavali myła i zaachvočvali myć ruki. U vyniku kolkaść zachvorvańniaŭ na dyjareju źniziłasia na 53% u paraŭnańni z kantrolnaj hrupaj, jakaja nie myła ruki.

«Myćcio ruk musić być zvyčkaj. Štości zrabiŭ — pamyj ruki. Schadziŭ u prybiralniu — pamyj ruki, viarnuŭsia dadomu — pamyj ruki, myŭ padłohu — pamyj ruki. U hetaj spravie nadta časta nie byvaje. Asabliva heta aktualna ŭ pieryjad epidemij. Toj ža hryp časta pieradajecca praz ruki: chtości čychnuŭ, potym pacisnuŭ ruku, inšy čałaviek dakranuŭsia da nosa ci vačej — i zaraziŭsia», — kaža namieśnik hałoŭnaha ŭrača Haradskoj kliničnaj infiekcyjnaj balnicy Minska Śviatasłaŭ Vielhin.

Vielhin nahadvaje, što myć ruki treba abaviazkova z myłam:

«Uračy lubiać haspadarčaje myła, ale padyjdzie luboje. Adnak najbolš hihijenična karystacca vadkim myłam, bo na kavałku ćviordaha myła mohuć zachoŭvacca mikraarhanizmy».

Kolki času treba pryśviacić myćciu ruk? Centr pa kantroli za zachvorvańniami ZŠA rekamienduje myć ruki nie mienš za 20 siekund. Ale bolšaść krynic nastojvaje na 40–80-siekundnym myćci. Pry hetym staranna namylić treba ŭsiu pavierchniu ruk: dałoni, tylnuju pavierchniu ruk, mižpalcavuju prastoru. Cikava, što daśledčyki nie vyjavili vialikich adroźnieńniaŭ u efiektyŭnaści pamiž prostym i antybakteryjalnym myłam. A voś samym efiektyŭnym srodkam sanacyi ruk pakul zastajecca vykarystańnie antysieptyku dla ruk na asnovie śpirtu. 

• 0
• 0
• 0
• 0
• 0
• 0
• 0
• 0