Minfin zaniepakojeny nizkaj efiektyŭnaściu pracy pramysłovych pradpryjemstvaŭ

Ministerstva finansaŭ Biełarusi zaniepakojena vynikami finansava-haspadarčaj dziejnaści pramysłovych pradpryjemstvaŭ u 2014 hodzie.

«Asablivuju zaniepakojenaść u Ministerstva finansaŭ sioleta vyklikaje nizkaja efiektyŭnaść pracy arhanizacyj pramysłovaści i, jak vynik, mahčymaść nievykanańnia imi ŭmoŭ akazańnia dziaržaŭnaj padtrymki», — zaznačaje načalnik hałoŭnaha ŭpraŭleńnia finansaŭ pramysłovaha i paliŭna-enierhietyčnaha kompleksaŭ Minfina Alena Piečań u materyjale, apublikavanym u kastryčnickim numary viedamasnaha časopisa Minfina «Finansy, učiet, audit». 

U jakaści prykładu pryvodzicca situacyja, što skłałasia ŭ kancernie «Biellespapierapram». Za pieršaje paŭhodździe hetaha hoda z 15 arhanizacyj kancerna, jakim akazvajecca dziaržpadtrymka, 11 atrymany straty ad realizacyi pradukcyi. 

«Stratnaść arhanizacyj značna zvužaje resursnyja mahčymaści haliny (hetaj i inšych) pa finansavańni svaich prajektaŭ, što nie dazvalaje im u zapłanavanych abjomach sfarmiravać inavacyjny i inviestycyjnyja fondy. Bolš za toje, niazdolnaść takich pradpryjemstvaŭ svoječasova zabiaśpiečvać viartańnie biudžetnych pazykaŭ, a taksama kredytaŭ, uziatych pad harantyi ŭrada, ciahnie za saboj «šlejf» prablem i dla biudžetu», — kanstatuje Alena Piečań. 

Pa acenkach Minfina, arhanizacyi «Biellespapraprama» siońnia nie ŭ stanie samastojna zaviaršyć realizacyju inviestycyjnych prajektaŭ, tamu dziaržava akazała pradpryjemstvam dziaržpadtrymku i ŭniasie ŭ 2014 hodzie ŭ ich statutnyja fondy amal tryljon rubloŭ.

Razam z tym Minfin ukazvaje na nizkuju prapracoŭku inviestycyjnych prajektaŭ pradpryjemstvami «Biellespapieraprama». «Sukupnaść pralikaŭ viadzie da nizkaj addačy ŭkładańniaŭ, jakaja prajaŭlajecca ŭ niedasiahnieńni zapłanavanych pakazčykaŭ prajekta (pradukcyjnaści pracy, dadadzienaha koštu, terminaŭ akupnaści inš.)», — zaznačajuć u Minfinie. 

Nahadajem, pierad kiraŭnictvam haliny pastaŭlena zadača madernizavać drevaapracoŭčyja pradpryjemstvy. U śniežni 2012 hoda Alaksandr Łukašenka, pryznačajučy Alaksandra Pierasłaŭcava staršynioj kancerna «Biellesbpapierapram», patrabavaŭ dasiahnuć vyšyniaŭ u vyniku madernizacyi drevaapracoŭčych pradpryjemstvaŭ. «Na drevaapracoŭcy my navučym i inšych, jak treba pracavać i stavicca da spravy», — zaznačaŭ Łukašenka. 

Praz hod, u listapadzie 2013-ha, Łukašenka źniaŭ Pierasłaŭcava z pasady za nienaležnaje vykanańnie daručeńniaŭ pa madernizacyi drevaapracoŭčych pradpryjemstvaŭ. Pa ŭkazie prezidenta były kiraŭnik kancerna byŭ pieraviedzieny na pracu ŭ budaŭničy trest № 21, dziejnaściu jakoha Łukašenka zastaŭsia niezadavoleny paśla naviedvańnia «Barysaŭdreva». 

Ciapierašniaje kiraŭnictva «Biellespapieraprama» stavić zadaču zaviaršyć madernizacyju drevaapracoŭčych pradpryjemstvaŭ da kanca 2014 hoda. «My pavinny daručeńnie prezidenta vykonvać u poŭnym abjomie. Madernizacyja drevaapracoŭki znachodzicca na zaviaršalnaj stadyi. Asnoŭnyja zapłanavanyja da ŭvodu sioleta dzieviać pradpryjemstvaŭ buduć uviedzieny ŭ ekspłuatacyju», — paviedamiŭ žurnalistam u vieraśni pieršy namieśnik staršyni kancerna Dźmitryj Lizura.

• 0
• 0
• 0
• 0
• 0
• 0
• 0
• 0