Pravaachoŭnyja orhany zatrymali žychara Baranavič Dźmitryja Pałojku, piša sajt pravaabaroncaŭ-viasnoŭcaŭ spring96.org. Jon źmieščany ŭ izalatar časovaha ŭtrymańnia i asudžany da 10 sutak aryštu.
Jak paviedamiŭ pravaabaronca Siarhiej Hoŭša, «praz znajomych ja daviedaŭsia, što na jaho byŭ składzieny administracyjny pratakoł za drobnaje chulihanstva», — kaža pravaabaronca. Akramia taho, jon adznačyŭ, što milicyja dapytvaje ŭsiu radniu Dźmitryja Pałojki i zabaraniaje svajakam pakidać Baranavičy.
Viadoma, što apošnija paŭhoda mužčyna pravioŭ u Ukrainie. Imia Pałojki prysutničaje ŭ źlitych u internet śpisach bataljona «Danbas», jaki byŭ udarnaj siłaj u antyterarystyčnaj apieracyi, što pravodziłasia Ukrainaj u Danbasie. Jak miarkujuć va Ukrainie, śpisy byli zdabytyja i apublikavanyja rasijskimi śpiecsłužbami. Praŭda, jość imaviernaść, što hetyja śpisy fejkavyja.
Telefon Źmitra Pałojki paviedamlaje, što «abanient niedastupny». Haradskaja milicyja kaža tolki pra toje, što aktyvist znachodzicca ŭ izalatary časovaha ŭtrymańnia. Nijakaj inšaj infarmacyi bolš nie dajuć.
Pavodle infarmacyi radyjo «Svaboda», Źmicier Pałojka jechaŭ u Baranavičy, kab pradać tam svaju kvateru. Paśla hetaha chłopiec mierkavaŭ viarnucca ŭ Kijeŭ.
Pa słovach Siarhieja Hoŭšy, heta sprava składanaja i dalikatnaja.
Usiaho, jak miarkujecca, u skład roznych ukrainskich dobraachvotnickich bataljonaŭ uvachodzili nie mienš za 20 biełarusaŭ.
Hetyja bataljony vajavali na pieradavoj uviesnu i ŭletku 2014 hoda. Jany adyhrali hałoŭnuju rolu ŭ strymlivańni rasijskich šturmavikoŭ u pieryjad, kali bajazdatnaść ukrainskaj prafiesijnaj armii była nizkaj.
Kamientary