Piać faktaŭ pra premjer-ministra Andreja Kabiakova

Siońnia Alaksandr Łukašenka padpisaŭ ukaz ab pryznačeńni Andreja Kabiakova premjer-ministram Biełarusi. Jon zajmaje hetuju pasadu ad śniežnia 2014 hoda. Pavodle zakanadaŭstva, paśla prezidenckich vybaraŭ kiraŭnik krainy znoŭ musić aficyjny zaćvierdzić urad.

Naradziŭsia ŭ Maskvie

Zrešty, Kabiakoŭ žyvie na terytoryi Biełarusi z troch hadoŭ. Niamała kryvi jon papiŭ rasijskamu boku na pieramovach ab enierhanośbitach, što tradycyjna adbyvalisia pad Novy hod u Kramli.

«A što mnie rabić u Maskvie? Tak, ja tam naradziŭsia, ale z 1963 hoda žyvu tut. Nikudy źjazdžać z našaj krainy ja nie źbirajusia», — skazaŭ niejak Andrej Kabiakoŭ.

Usio ž na histaryčnuju radzimu vypravicca jamu daviałosia — u jakaści pasła. Praŭda, prabyŭ jon na hetaj pasadzie mienš za hod (ad listapada 2011).

Alaksandr Łukašenka časta pryznačaje na važnyja pasady nieŭradžencaŭ Biełarusi. Takija ludzi apryjory nie mohuć vyraści ŭ kankurentaŭ jamu. Na siońnia, ministry unutranych spravaŭ, pa nadzvyčajnych situacyjach rodam nie ź Biełarusi.

Skončyŭ Avijacyjny instytut

Kabiakoŭ atrymaŭ dobruju adukacyju. U 1983 hodzie jon skončyŭ Maskoŭski avijacyjny instytut. Pastupić tudy ŭ 1970-yja było nialohkaj spravaj. Praŭda, u lotčyki chłopiec nie pajšoŭ. U hod abviaščeńnia niezaležnaści Kabiakoŭ jašče skončyŭ narhas i Instytut palitałohii i sacyjalnaha ŭpraŭleńnia KPB.

Prateže Daŭhalova

Jon viarnuŭsia ŭ Biełaruś, dzie spačatku papracavaŭ na zavodzie imia Vaviłava ŭ Minsku, a potym pierajšoŭ na rahačoŭski zavod «Dyjaprajektar». Tam Kabiakoŭ prajšoŭ praz roznyja pasady: staršy majstar, namieśnik načalnika cecha, namieśnik načalnika zboračnaj vytvorčaści.

Charakterna, što ŭ hety čas na zavodzie pracavaŭ Vasil Daŭhaloŭ, jašče adna vidnaja asoba biełaruskaj palityki. U 1990 Daŭhaloŭ trapiŭ u Viarchoŭny Saviet. U 1994 jon stanie namieśnikam kiraŭnika Administracyi prezidenta. Mienavita Daŭhaloŭ pieraciahnuŭ Kabiakova za saboj u Minsk. 35-hadovy namieśnik dyrektara «Dyjaprajektara» staŭ namieśnikam načalnika Słužby kantrolu, anałaha siońniašniaha KDK. Paśla taho Kabiakoŭ tak i nie vypadaŭ z uładnaj abojmy. U jaho byli pasady staršyni Kamiteta dziaržkantrolu, ministra ekanomiki, vice-premjera.

Pracuje ad 8:00 da 21:00, i na vychadnych

Niekali Kabiakoŭ padzialiŭsia z žurnalistami svaim pracoŭnym hrafikam.

«Ja pracuju zvyčajna ad 8:00 da 21:00. Chiba što ŭ vychadnyja bolš pracavać staŭ». Tady Kabiakoŭ byŭ jašče vice-premjeram. «Hadzińnik u mianie nie «Łuč», abutak nie pamiataju, a voś praktyčna ŭsio astatniaje — ajčynnaje», — zaznačyŭ jon.

Łukašenka chryściŭ syna Kabiakova?

Chodzić takaja bajka, što adnojčy Andrej Kabiakoŭ paprasiŭ Alaksandra Łukašenku stać chrosnym baćkam syna vice-premjera. I Łukašenka, jak nie dziŭna, zhadziŭsia. Paśla hetaha kiraŭnik dziaržavy zaŭsiody mieŭ peŭny pijetet da Kabiakova.

Kabiakoŭ maje dom u Drazdach. Dla jaho budaŭnictva jon braŭ valutny kredyt u pamiery 120 tysiač dalaraŭ pad zakład doma.

• 0
• 0
• 0
• 0
• 0
• 0
• 0
• 0